Элдор Суюнов: "Ўйлашимча, "Бавария" Арсен Венгер жамоаси дарвозасига 4-5 та гол киритади"

Унда "Бавария" - "Арсенал" ва "Атлетико" - "Милан" жамоалари ўзаро беллашишади. Бу учрашувлар жуда кўпчиликнинг диққат эътиборида бўлиши табиий. Биз Ўзбекистон терма жамоаси ва Қаршининг "Насаф" клуби посбони Элдор Суюнов билан бугунги ўйинлардан нималарни кутаётгани ҳақида сўрадик.

Бугунги ҳар иккала баҳс ҳам жуда қизиқарли ва томошабоп кечади деб ўйлайман. Куниннг марказий баҳси сўзсиз Мюнхенда "Бавария" - "Арсенал" ўртасида бўлиб ўтади. Бу ўйин ҳақида фикр юритадиган бўлсам, менимча, "Бавария" жамоаси йирик ҳисобда Лондон жамоасини мағлубиятга учратади. Бу мени шахсий фикрим. Ўйин ҳужумкор тарзда кечиши аниқ. Ўйлашимча, "Бавария"  Арсен Венгер жамоаси дарвозасига 4-5 та гол киритади.

"Атлетико" - "Милан" тўқнашуви ҳам футбол мухлисларини зериктириб қўймайди деб ўйлайман. Биринчи ўйинда "Атлетико" ғалаба қозонган бўлсада, фикримча, бугун "Милан" клуби вазиятни ўз томонига ижобий ҳал эта олади. Кларенс Зеедорф бошчилик қилаётган "Милан" жамоаси бундай турнирларда қандай ўйнашни яхши билади. Бугунги баҳсда "Милан"га тажриба ас қотиши мумкин. "Бавария" ва "Милан" кейинги босқичга йўл олади деб ўйлайман.

Мен қайси ўйинни кўраман? Албатта "Бавария" - "Арсенал" баҳсини танлайман. Бу учрашув кескин курашларга бой ва асосийси, томошабоп бўлади. Мен учун "Бавария" посбони Мануэль Нойернинг ўйинлари жуда қизиқ. Унинг ҳар бир ҳаракатлари ва сейвлари кўпчилик қатори мени  ҳам лол қолдириб келади. Шунингдек, Тони Кроос ва Тиаго Алькантараларнинг кўрсатаётган футболи менга манзур бўлмоқда. Бу футболчилар ҳозирда ўзининг юксалиш даврида.

Диего Коста ва Марио Балотелли дуэлида Марио Балотеллинининг имкониятларини юқорироқ баҳолаган бўлардим. Ўйлашимча, Марио Балотелли бугун Куртуа дарвозасига йўл топа олади.
 
Шаҳбоз Беғамов