"Эл-Класико" олдидан журналистлар қандай фикрда?

Азалий рақибларнинг бугунги учрашувида дунё футбол аҳли иккига ажралади. Бугунги футбол спектакли миллионлар ўйинига қизиқмайдиган инсонларни ҳам экран қаршисига "михлайди". Сизу биз интиқлик ила кутган драматик баҳс олдидан юртимизда фаолият юритаётган спорт журналистлари ўз фикрларини билдиришди.

Даврон Файзиев (шарҳловчи)

“Эл-Класико турнига ҳам ўтказиладиган вақтига ҳам жамоаларнинг қайси поғонада кетаётганига ҳам ва қандай таркиб майдонга тушишига ҳам қарамайди. Эл-Класико ҳар қанақа вазиятда ҳам қизиқарли ўтади. Шунинг учун ҳам бу классиконинг ўзига хос томони қидириш ёки бўлмасам қандайдир бошқа маълумотлар билан уни бойитиш шарт эмас. Шундоқ ҳам классико қизиқарли ўтади. Мени фикримча интригани оширадиган бир неча фактор бор. Масалан “Реал” ушбу ўйинга клублар ўртасида жаҳон чемпиони сифатида келади. “Барселона” Испания етакчиси сифатида келади. Иккаласининг ҳам бир-бирига нисбатан плюс тарафлари бор. Шунақа пайтлар ҳам бўлганки, бу сафар аниқ “Барселона” ғалаба қозонади ёки бўлмасам “Реал” бу сафар аниқ зафар қучади деган мавсумлар ҳам бўлган. Лекин бу галги мавсум ундай эмас. Бу мавсумда икки жамоани ҳам мухлислар бир хилда кўришмоқда. Мен ҳам худди шундай кўряпман. Бу мавсумда фаворитни аниқлаш жуда ҳам қийин.

Гарет Бэйлни Эл-Класикода майдонга тушиш имконияти пайдо бўлди деб ўйлайман. Чунки Бэйл анчадан бери майдонга тушмаяпти. “Реал” Бэйлсиз ўйнашга ўрганиб бўлди. Гарет Бэйлнинг йўқлиги “Реал” учун ҳозирги кунда муаммо эмас. Лекин Эл-Класикода Бэйл орқали ўйинни кучайтириш Зиданда пайдо бўлди. Бу “қаймоқранглилар” учун фойдали, деб ўйлайман. Ҳозирги спорт формасида Гарет Бэйл асосий таркибга тортмаслиги мумкин. Зидан ўтган мавсум ротатция орқали муваффақиятга эришган. Лекин бу мавсум мана шу етишмаяпти. Захирадан майдонга тушаётганлар ўйинни кучайтира олмаяпти. Шу муносабат билан Бэйлнинг майдонга қайтиши, спорт формасида бўлмаса ҳам захирада ўтириши Зиданга сал бўлса ҳам ўзгаришлар орқали ўйинга таъсирини беради.

Мени фикримча бугунги учрашувда йирик ҳисоб қайд этилмайди. Чунки бу биринчи давра. “Барселона” ҳамма нарсани эсдан чиқариб ҳужумга берилиб кетмаса керак. Чунки “каталонияликлар” турнир жадвалида шундоқ ҳам етакчилиб қилиб турибди. Меҳмонда хотиржам ўйин кўрсатади. Тўп назоратини бериши ҳам мумкин. Бу учрашувда “Барса” ҳар сафаргидек 70 фоиз тўпга эгалик қилмаса керак. Бу борада “Реал” тенгма-тенг кураш олиб боради. “Реал”га келадиган бўлсак, “Қироллик клуби” сал таваккаллик қилиши мумкин. Чунки “Реал” орадаги фарқни қисқартириши керак. Ўз уйида ўйнайди. Шунинг учун ҳам бу учрашувда кўп гол кутмаяпман. Таҳминимча бу ўйинда дуранг натижа қайд этилса керак. Бу икки жамоани устун томонларини кўрмаяпман. Иккала жамоа ҳам бир маромда кетаяпти. “Реал” мавсумни яхши бошламаган бўлиши мумкин. Лекин муҳим ўйинларда ўзига керакли бўлган натижаларни қўлга киритмоқда. “Барселона” эса барқарорлик кўрсатмоқда. Футболда барқарорлик футболда энг муҳим жиҳатлардан бири. Ушбу ўйинда 1:1 натижаси қайд эитилиши мумкин, деб ўйлайман. Бу мени таҳминим. Мен таҳминларим кўпам ўзини оқламайди. Чунки таҳмин қилишдан олдин таҳлил қиламан. Агарда таҳлил орқали таҳмин қилиш футболда тўғри бўлиб чиққанда бу спортни қизиғи бўлмасди. Таҳминлар ҳар доим ҳам ўзини оқламайди. Футбол шуниси билан қизиқ.

Фаррух Расулов (шарҳловчи)

Бугунги учрашув бошқа Эл-Класиколардан фарқи йўқ. Бу мени шаҳсий фикрим. “Барселона”да бироз ўзгариш бўлган. Бу Неймарнинг ПСЖга кўчиб ўтиши. Иккала жамоада ҳам таркибда муаммолар бор. Шунинг учун ҳам бу нарса ўйинга таъсир ўтказади, деб ўйламайман. Чемпионатда “Барселона”нинг турнир жадвалида карвонбошилик қилаётгани “Реал”га ёқмайди. Шунинг учун ҳам бугунги учрашувда “қаймоқранглилар” қандайдир босим билан ҳужумкор ўйин кўрсатиб ўтказиши мумкин. Мени назаримда бу ўйин “Барса”дан кўра кўпроқ “Реал”га керак. Чунки очколар фарқини барча кўриб турибди.

“Барселона” клуби “Сантьяго Бернабеу”да ўйнашни биладиган жамоа. Тарихга қарайдиган бўлсак, Месси сўнги дақиқада гол урган ўйинда “Барса”нинг ғалабаси билан тугаган. Ўшанда кўпчилик “Реал” ғалаба қозонса керак деган таҳминлар йўқ эмас эди. Лекин ўша учрашувда “Барселона” ғалаба қозонганди. Таркиб борасида “каталонияликлар”да бироз пасайиш бор. Иккала жамоа таркиб борасида тенг кучли деб айта олмайман. “Реал” клублар ўртасида жаҳон чемпиони бўлиб қайтди. Ички муҳит аъло даражада. Футболчиларнинг кайфияти зўр. “Реал”нинг бугунги рақибидан устунлик томонлари мана шу.

Гарет Бэйлнинг майдонга тушиш ёки тушмаслиги “Реал”нинг ўйинига таъсир ўтказади, деб ўйламайман. Чунки “Реал” Бэйлсиз ҳам бир нечта учрашувларни ўтказди. “Қироллик клуби”ни Гарет Бэйл ёки Роналдуга боғланиб қолган жойи йўқ. Шуни эсдан чиқармаслик керак. Бундай йўқотишлар ўйинга ҳеч қандай таъсир ўтказмайди. Лекин “Барселона” томондан олиб қарайдиган бўлсак, Неймарнинг йўқлиги бугунги ўйинда яққол кўзга ташланади. Аниқ биламан ушбу баҳсни Неймарнинг ўзи ҳам кузатиб боради ва майдонда йўқлигини ўзи ҳам хис қилса керак.

Юқорида айтиб ўтганимдек “Реал”да муҳит аъло даражада. Таркибга ҳам бир, икки нафар футболчилар қайтишди. Йўқотишлар ва ҳар хил босимлардан Зидан энди ўзига келмоқда. Яна бир устун жиҳати бу ерда Роналдунинг борлиги. Ўтган бир хафтанинг ичида “Реал”да қандайдир ўзгаришлар бўлиб кетди. “Реал”нинг бир камчилиги бор. Бор эътиборини ҳужумга қаратган пайтда ҳимояни эсдан чиқариб қўяди. Бугунги баҳс қайсидур маънода чемпионликни хал қилиб беради. Агарда Мадрид клуби бугунги ўйинда ғалаба қозона олмаса “Барселона”ни тўхтатиб қолиш анча қийин бўлиб қолади.

Валверде жуда ҳам қийин ҳолатда турибди. Пако Алкасер ва яна бир нечта ўйинчилар “Барселона” даражасидаги футболчилар деб айта олмайман. Мавсум бошида қилинган трансферлар ўз сўзини айтмоқда. Лекин жамоада Суарес, Месси ва Иньеста каби футболчиларнинг борлиги “Барселона”нинг энг катта ютуғи ҳисобланади. Жамоа футболчиси Хорди Алба ҳам яхши томонга анча ўзгарган. Мени фикримча бугун қанотлардан яъни Хорди Алба ҳаракат қиладиган қанотдан кўпроқ ҳужумлар уюштирилади. “Каталонияликлар” кўпроқ стандарт вазиятларга эътиборини қаратса керак, деб ўйлайман. “Реал”нинг ҳимоядаги муаммоларини “Барселона” мураббийлар штаби яхши билишади. Зидан бу мавсум кўп қоқилди. Валверде Нима сабабдан “Реал” қоқилганлигини яхши билади.

Диёр Имомхўжаев (шарҳловчи)

Олдиндан бир нима айтадиган қобилиятим йўқ. Ортда қолган “Эл-Класико”ларни бир-бири билан исталганча солиштириш мумкин. Бироқ келгусидагиларининг ҳаммаси битта мақомда — ўта ҳаяжонли. Эътиборга молик жиҳат, мазкур ўйиннинг йил сўнгида ўтаётгани. Шу билан “Реал” ҳам, “Барселона” ҳам янги йил танаффусига чиқади. Ва албатта, клуб футболчилари янги йилни тушкун кайфиятда қарши олишни истамайди. Яна бир қизиқ жиҳат шундаки, Месси ҳам, Роналду ҳам 2017 йил давомида 53 тадан гол урди. Бугун уларнинг рақобати фонида даҳшатли ўйин гувоҳи бўламиз.

“Барселона” мавсумни фантастик руҳда бошлади. Улар кучли бешликнинг мағлуб бўлмай келаётган икки жамоасидан бири, футболчилар яхши формада. Қолаверса, йил аввалига икки Суперкубок ўйинида каталонияликлар мағлуб бўлган. Ўтган давр давомида Эрнесто Вальверде ўша мағлубиятларни унутмаганига ишонаман. Шу важдан олиб қараганда, “Барса”нинг имконияти юқорироқ.

“Реал” эса рақибидан ортда, мағлубиятлар кузатилди ва албатта, ўз майдонида тўп суради. Рақиби билан орадаги фарқни яқинлаштириш учун бундан ҳам яхши имконият йўқ. Бу 3 очколик ўйин эмас. Шу важдан қаралса, “Реал”нинг имконияти юқорироқ. Чунки анча ўзиб кетган “Барселона” футболчилари йўқотиш уларга жуда катта зарар келтирмаслигини деярли билиб туришибди. “Реал”да эса бундай фараз йўқ, мағлубият уларни 500 фоиз қаноатлантирмайди.

Бэйлнинг майдонда бўлиши яхши, албатта. Бироқ ҳозирги ҳолатда акс таъсир кўрсатишига ишонмайман. Биринчидан, Бэйлни ўйинга 100 фоиз тайёр деб ўйламайман. Иккинчидан, ўтган давр давомида “Реал” футболчилари Бэйлсиз ўйнашга деярли кўникиб улгуришди. Тўғри, қайтиши жамоани кучайтиради. Шу билан бирга, йўқлиги “Реал”н кучсиз қилмайди.

Олдинда Иско, Бензема, Роналду бор. Ўртада эса Кроос, Модрич, Каземиро. Лукас Васкес ҳамда Марко Асенсио билан ўйинни кучайтирса бўлади.

Билмадим қандай ҳисоб қайд этилади. Бундай беллашувларда йирик натижаларнинг кузатилиши нормал ҳолат ва бу ғолиб клубнинг мағлубдан жуда кучли эканини билдирмайди. Футболчиларнинг майдондаги руҳий ҳолати ва ўйиннинг бориши шунга сабаб бўлиши мумкин.

Кимнинг қўли баланд келиши борасида айтиш у ёқда турсин, ўйлашни ҳам истамайман. Мен бундай ўйинларни кутилмаган совғаларга тўла ҳолда ва албатта бир хил рақобат фонида кўришни истайман.

Алишер Узоқов (шарҳловчи)

Тўғрисини айтсам бугунги учрашувга мени қизиқишим унчалик баланд эмас. Бугунги учрашувдан шунчаки қизиқарли, баҳс-мунозараларга бой ва жанговар ўйин кутаяпман. Ҳозир “Барселона” ва “Реал Мадрид” ўртасидаги зиддят бироз пасайиб қолган. Бундан 5, 6 йил аввал, бу икки клуб майдонда ҳақиқий жанг олиб борарди. Хаттоки майдонда бир-бирини аямасди. Ушбу жамоаларни айни пайтда қайси поғонада турганининг ҳеч қандай аҳамияти йўқ. Ушбу жамоалар ўртасидаги ўйин умуман бошқача. Ушбу икки клуб ўртасидаги учрашув алоҳида Ла лига. Битта Ла лига бор 38та тур бўлади, яна бир Ла лига бор 2та ўйин ва 2 тур бўлади. Яъни бу “Реал” ва “Барселона” ўртасидаги учрашув. Роналду бу йил у даражада кучли ўйин кўрсатаётгани йўқ. Месси ва Роналду бугунги учрашувга ўз таъсирини ўтказади. Месси ҳақиқий истеъдод эгаси. Роналду шу даражасига ўз меҳнатлари билан эришган. Бугун Роналду нисбатан кўпроқ меҳнат қилади, деб ўйлайман. Роналдуда ҳам истеъдод бор, лекин Мессига ўхшаган талант эгаси эмас. Мени фикримча бугун “Реал” ғалаба қозонса керак.

Ориф Толипов (шарҳловчи)

Менимча, “Реал” ва “Барселона”нинг ҳар бир учрашуви алоҳида, мустақил ҳодиса. Яъни, бу икки жамоа учрашганда аввалги ўйинлар статистикаси, ҳозирга турнир жадвали ёки бошқа факторлар ўз кучини йўқотади. Қайси жамоа олдиндаги 90 дақиқага кўпроқ тайёр бўлса, ўша ғолиб бўлади. Бэйл кучли футболчи, аммо "Реал" у таркибда бўлмаса ҳам, мураккаб ўйинларда ўзини йўқотиб қўймаяпти. Олдимизда турган Эл-Класико голларга бой бўлади деган таҳминим бор. Шундай экан, ҳар қандай рақамлар ва тарихни четга суриб қўйган ҳолда ажойиб ўйин кузатамиз деб қоламан.

Жаҳонгир Сотволдиев суҳбатлашди