Достон Турсунов: “Машғулотда ҳамма астойдил ишламоқда”

Машғулотлар билан бирга синов-назорат ўйинларида ҳам иштирок этаётган ёшларимиз куни-кеча “Навбаҳор” билан куч синашиб, 2:1 ҳисобида мағлуб бўлди. Учрашувдан сўнг ҳимоячи Достон Турсунов йиғин ҳақида фикрларини билдириб ўтди.

- 19 февраль куни яна Тошкентда навбатдаги йиғинни ўтказишга киришдик. Чиғатойда йиғилдик. Кунига икки маҳалдан машғулот ўтказилмоқда. Эрталаб жисмоний тайёргарлик бўйича ишласак, тушликдан сўнг тўп билан тактик жиҳатлар устида шуғулланяпмиз. Машғулотларни Равшан ака Ҳайдаров ва Илҳом ака Мўминжонов олиб бормоқда.

- Табиийки ҳар бир футболчи ўзидан яхши таассурот қолдириш мақсадида астойдил ишламоқда. Чунки ҳар бир ўйинчи мундиалда иштирок этишни истайди. Бу йўлда ўзимизни ижобий томондан кўрсатишимиз шарт бўлади.

- Бу сафарги йиғинимизга бир қатор янги номзодлар таклиф этилганини кўриш мумкин. Ёшимиз тенг бўлгани учун ҳам уларнинг киришиб кетиши у қадар мураккаб бўлмайди деб ўйлайман.

- Мақсадим ёшлар терма жамоамиз билан ЖЧга бориш ва у ерда ҳам ўзимни кўрсатиш. Қолаверса “Нефтчи”да дебютимни ўтказишни хоҳлайман. Насиб қилса бу йил асосий таркибда ўйнаш учун бор кучим билан харакат қиламан – дейди Достон Турсунов.

Исломбек Рустамбеков