“Динамо”да нима гап?

Маълум бўлишича, ўтган йили Баҳром Ҳакимов бошчилигида жамоа қуйи лигага тушиб кетгач, раҳбарият бу йил ҳам ушбу мутахассиснинг ўзи фаолиятини давом эттирган холда, яна кучлилар сафига қайтариши лозимлигини билдирган экан. 

Жамоа мавсумга тайёргарликни 17 январдан Самарқандда бошлаганди. Ўз қароргоҳида асосан маҳаллий футболчилар билан йиғин ўтказган “Динамо” 10 кундан сўнг кичик таътилга чиқди. Аммо таътил ҳали узоқ давом этадиган кўринади. Айтишларича жамоада молиявий муаммолар кўндаланг турибди. Номини сир сақлаш шарти билан айтган инсоннинг гапларига кўра, жамоанинг йиғин ўтказишга бугунги кунда имконияти йўқ экан. Бош мураббий Баҳром Ҳакимов таҳминан 10 кунча Самарқандда бўлган ва клуб раҳбарияти билан учрашув ташкил этишини кутган. Аммо бу амалга ошмади ва бош мураббий уйига қайтиб кетган. Ваҳоланки самарқандлик ашаддий мухлислар бу йил севимли жамоасини яна элитага қайтишини кутмоқда. Шу боис кўпчилик бу йил “Динамо”ни олий лигага чиқиш учун асосий давогарлардан бири дея таҳмин қилмоқда.

Бироқ тайёргарлик ҳозирча тўхтаб турибди. Бундай пайтда курашчан жамоа тузиб, яна олий лигага қайтиш бироз мушкул. Яна ким билади дейсиз. Эхтимол ҳудди ўтган йили ёзда таркиб йиғгандек, бу йил ҳам чемпионат старти арафасида жамоа шакллантирилар. Буни вақт кўрсатади.