Дибала Моуриньо билан тил топиша оладими ёки бу трансфер унинг фаолиятини барбод қиладими?

Жорий ёзги трансферлар ойнаси ҳозирча шов-шувли шартномаларга бой бўлмоқда — Поль Погба "Ювентус"га кетди, "Бавария" Матийс де Лигтни харид қилди, Эрлинг Холанд "Манчестер Сити" томон йўл олди. Бир неча кун аввал эса яна бир хабар тарқалди: "Пауло Дибала "Ювентус" билан хайрлашди ва "Рома" билан шартнома имзолади.

Янги жамоада уни янги вазифалар, янги роль ва римликлар бош мураббийи Жозе Моуриньо (!) кутиб турибди.

Дибала — топ-футболчи. Бироқ иқтидорини маълум позицияларда кўрсата олди

Агар Моуриньо трансфердан максимал фойда олишни истаса, Дибалани майдонга жойлаштириш борасида яхшилаб ўйлаб кўриши лозим. Сабаби футболчининг "Ювентус"даги фаолияти орқали у маълум позициялардагина чинакамига яхши ўйнай олиши юзага чиқди. Аргентиналик "кекса синьора"га келганидан сўнг, аста-секин марказий ҳужумчи позициясидан "ўнлик" амплуасига ўтди. Туринликлар бош мураббийи Массимилиано Аллегри шундай қарорга келганди. Бу Пауло фаолиятидаги тўғри танлов эди — у янги ролида ёрқин намоён бўлди. Италия А Серия 2017/18 йилги мавсумининг 33 учрашувида 22та гол урди ва 5та голли пас берди. Кейинроқ форвардни ўнг қанотда ўйнатиб кўрмоқчи бўлишди, бироқ ушбу позицияда Дибалада муаммолар юзага кела бошлади.

Римда эса ҳужум марказидаги жой аргентиналикка осонликча бериб қўйилмайди — Тэмми Абрахам ушбу позицияда яхши ўйнай олди. Шунинг учун, инглизни ўз жойида қолдириш жамоа учун яхшироқ. 4-2-3-1 схемасига ўтиш мантиқан тўғри бўлади — Пауло учун муваффақиятли бўлган мавсумда "Ювентус" шу тактика бўйича ҳаракатланган эди. Римликлар ҳам ўтган мавсум боши ва ўрталарида шундай ўйнашганди. Шу жойлашув сабаб Генрих Мхитарян ва Лоренцо Пеллигрини ҳужумдаги ўйин вақтини бўлишишган. Агар арман кетганини ҳисобга олсак, Дибаланинг келиши мутлақ тўғри қарор — у ҳужумга ўзгарувчанлик қўшади.

Лекин бир нарсани эътиборга олиш керак: Аллегри бошчилигидаги "Ювентус" Моуриньонинг "Рома"сига қараганда анча ташаббускор эди. Португалиялик фаолиятини "иккинчи рақам" остида қурди, энди эса тўп учун курашда чуқурроқдан ўрин олади. Пауло энди ҳимоявий ҳаракатларда ҳам иштирок этиши талаб этилади. Демак тўпни рақиб майдонидан узоқроқда қабул қилишига тўғри келади. Муаммонинг эҳтимолий ечими Абрахам-Дибала ҳужумчилар жуфтлигига ўтиш бўлиши мумкин.

Моуриньо ҳар доим характер талаб қилган — у Дибалани руҳан "эзиши" мумкин

Жозе ўзининг "оловли" интервьюлари билан машҳур — уларда португалиялик қўл остидаги ўйинчиларга қандай талаблар қўйиши аниқ сезилган.

2022 йил январда у шундай деган: "Бу жамоани кучайтириш учун менга уч йил вақт берилди, аммо бу борада менга клуб ёрдами зарур. Майдонда бирор нарса содир бўлганда, жамоада етакчилик сифатлари кўринмайди. Кучли характерга эга одам йўқ. Биз 6-7 ўриндан қониқиб юрадиган "комфорт зонаси"дан чиқишимиз шарт. Агар психологик жиҳатдан гапирадиган бўлсак, йигитларга мен уларнинг йўналиши томон эмас, балки улар менга қараб интилишлари кераклигини уқтирдим".

Аргентиналик форвард эса бунинг акси! Сабаби, унга қараб ёндашиш лозим —  ўйин модели унга қараб тузилади ва у учун оптимал позиция танланади. Роналду "Ювентус"га келгандан сўнг, Паулонинг сермаҳсуллиги пасайгани ҳам шундан далолат беради. Аллегри португалиялик форвард учун дарҳол янги схема тузди, аргентиналикни эса ўнг қанотда ўйната бошлади. Лекин у ерда Дибаланинг ўйини ўхшамади ва йўқолиб қола бошлади. Аввалги ҳолатига тўлиқ қайтишнинг эса иложи бўлмади.

Жозе эса матбуот анжумани вақтида жамоасини ер билан битта қилиши мумкин — бу жамоанинг ички муҳитига салбий таъсир қилади. Вазият мутахассиснинг "Манчестер Юнайтед"да Погба билан муносабатини эсга солади: француз ҳам кайфиятига қараб ўйнайдиган футболчи ҳисобланади, аммо Дибалага қараганда такаббур ва эринчоқроқ. Бироқ ўхшаш жиҳатлар Моуриньо Паулони шунчаки "еб ташалаши" мумкинлигига шаъма қилмоқда. Шундай бўлган тақдирда, у Римни тарк этади ва футболчилик фаолиятидаги бир неча йилни йўқотади.

Қишгача Жозе иш жойидан айрилиб қолиши мумкин — жадвалнинг ўрта қисми ёки ундан пастроғида бўлиш омадсизлик сифатида қабул қилинади

А Сериянинг охирги мавсумида "Рома"га барқарорлик етишмади — португалияликнинг ҳаммамиз ўрганган қарши ҳужумдаги "тузоқлари"сиз, шунчаки оддий "автобус" сифатида. Натижада жамоа еврокубокларда иштирок этадиган еттиликдан жой олди — олтинчи ўрин, 38 ўйинда 63 очко. Салбий таассуротларни Конференциялар Лигасидаги муваффақият бироз ювиб кетди. Бироқ факт фактлигича қолди — янги мавсумда ўсиш кўзга ташланмаса Италия клуби Моуриньо билан хайрлашишига тўғри келади.

Буни Дибаланинг трансфери ҳам исботлайди. Раҳбарият аргентиналикдек тайёр, сифатли футболчини таркиб қўшиб олиб ҳам натижа бўлмаслигини тушунмаслиги аниқ. Паулодан ташқари, жамоага Моуриньонинг эски танишларидан бири Неманя Матич ва Зеки Челик келиб қўшилди. Бўлажак мавсумга Чемпионлар Лигаси йўлланмаси қўлга киритилиши муваффақиятли кўрсаткич деб қабул қилинса ажаб эмас. Ўтган йили 7 очко етмай қолган эди.

Жозенинг ўзи бўлажак мавсум режалари ҳақида шундай деди: "Чемпионлар Лигасига йўлланмани қўлга киритишга уриниб кўрамиз, аммо сиз "Интер", "Милан" ва "Ювентус"нинг трансфер бозоридаги фаоллигини кўраркансиз, 4тадан 3та ўрин бандлигини қабул қилишга мажбур бўласиз. Тўртинчи ўрин бор — ўтган йили бу "Аталанта" бўлди, бу йили "Наполи". Кейингиси биз бўла оламизми? Ўйлашимча, бунга кучимиз етади. Бу кейинги мақсад".

Италия чемпионати янги мавсумидаги биринчи учрашувда римликлар 14 август куни "Салернитана"га қарши ўйнайди. Паулога майдонда қандай жой топилишига дастлабки жавобларни ўша ерда кўришимиз мумкин. Бироқ ҳозир саволлар етарлича: футболчи майдонни яхши кўради, узоқ масофадан зарба ва охирги узатмани бера олади, лекин менталитет бўйича Жозега мос тушмайди. Энг ёмон сценарийда Дибала учун бу фаолиятидаги энг омадсиз қадамлардан бирига айланади. У шундоқ ҳам "Ювентус"га Криштиану келгач, амалга оширилган ўзгаришларни ҳазм қилиши қийин бўлганди. Раҳбариятнинг хотиржамлигини инобатга олсак, Моуриньонинг истеъфосини кутишга асос йўқ. Шу сабабли, Пауло учун энг маъқул йўл "Рома"га тезроқ кўникиш ва энг яхши версиясини кўрсатиш.

Нозима Зарипова таржимаси