Депай фаолиятини А Серияда давом этиришга яқин

"Corriere dello Sport" нашри хабарига кўра, 26 ёшли форвард "Лион" билан ҳамкорликни давом эттирмоқчи эмас. Унинг француз клуби билан амалдаги шартномаси 2021 йилга қадар мўлжалланган. Жамоа раҳбарияти Депай билан янги битим тузишни уддалай олмаса, ҳужумчини келётган ёзда сотиб юборишга ҳаракат қилади.

"Лацио" мутасаддилари анчадан буён Депайни харид қилиш учун ҳаракат қилиб келади. Нидерландиялик футболчининг Римга кўчиб ўтишига ҳар доим унинг трансфер қиймати юқорилиги тўсқинлик қилар эди.

Мемфис айни пайтда декабрь ойида орттириб олган жароҳатидан тикланиш жараёнини бошдан ўтказмоқда. У Франция чемпионатининг жорий мавсумида 13 ўйинда майдонга тушиб, 9 гол ва 3та самарали узатмага муаллифлик қилган. 

Эслатиб ўтамиз, "Лацио" Италия чемпионатининг ортда қолган 26 туридан кейин 62 очко тўплагани ҳолда мусобақа карвонбошиси бўлиб турибди.