“Бир футболчи тарихи”. Ёшлигида “Пахтакор”нинг ёшлар жамоасига қабул қилинмаган Жалолиддин Машарипов ҳақида

Миржалол Қосимов, Азамат Абдураимов, Бахтиёр Ашурматов каби футбол юлдузларимиз мустақилликдан аввал ҳам, ундан кейин ҳам порлашган. 1991 йилдан кейин бизда ёш иқтидорлар чиқиши тўхтаб ҳам қолмади. Бизнинг футболимизга ажратилаётган пуллар шунчаки ҳавога учяпти деган фикрни айтувчилар, айнан шу спорт тури бўйича Осиёда нечанчи ўринда турганимизни-ю, бир футболчимиз ортидан юртимиз номи дунёга танилишини ўйлаб кўрсин. Бугун сиз билан – ўзбек футболидаги яна бир иқтидор, легионерга айланиши кутилаётган ва балки Элдор Шомуродов сингари кучли бешликка ўтиши мумкин бўлган (ким билсин дейсиз, ажаб эмас шундай бўлса) футболчи билан яқиндан, батафсилроқ танишамиз. Шу кунгача келиш йўлидаги машаққатлар, айтган сўзлар ва ҳоказо. Хоразм маконидан чиққан футболчи – Жалолиддин Машарипов бугунги қаҳрамонимиз. 

Биз футболчининг ёшлик чоғлари ҳақида тўхталадиган бўлсак мақолани икки қисмга бўлиб, айнан биринчи қисмини унинг ёшлигига бағишлашга тўғри келади. Яхшиси, 1 йил аввалроқ сайтимизнинг “Орзу” лойиҳасига берган интервюсида Машарипов ўзи ва ёшлик чоғлари ҳақида батафсил гапириб берган эди. Мақолани ўқишдан аввал, ушбу видеони кўришни тавсия қиламиз. 

Жалолиддин Машарипов – ким ўзи у?

Агар видеони кўрган бўлсангиз сиз бу саволга жавоб олдингиз деб ишонамиз. Шунда ҳам қисқача маълумот: Жалолиддин Қадамбоевич Машарипов 1993 йилнинг 1 сентябрь куни Хорзам вилоятида туғилган. “Пахтакор” жамоаси футбол мактаби тарбияланувчиси. 2013 йилгача “Пахтакор”нинг ёшлар жамоасида ўйнаган футболчи, 2013 йилдан кейин тошкентликлар сафида асосий футболчи. Агар биз юқорида келтирган интервюни кўра олмаган бўлсангиз, Жалолиддин Машарипов ўзи ёшлиги ҳақидаги бир интервюсидан парчани келтирамиз. “Маҳаллада 6 ёшимда футбол ўйнардик. Мактабга борганимда 1-синфда жисмоний тарбия устози ким футболга қизиқади деб сўраган. Ўшанда мактабда футбол тўгараги очилган. Футболга кириб келишимда акамнинг катта хиссаси бор. Футболга қизиқиш жуда қаттиқ бўлган. Овқат емасам ҳам, дарсларни қилмасам ҳам футбол ўйнардим. Мактабга оқ кўйнак, кастюм шимларни кийиб кетардим. Сумкамга китоб-дафтарлар эса футбол формаларимни солиб кетардим. Устозлар мени доим футбол майдонидан топиб келишарди. Синфда энг иккичи, майдонда энг аълочи бўлганман. Футболда доим бизнинг синф чемпион бўларди. Шунга синфда барча мени яхши кўрарди, синф раҳбаримиз баҳоларимни қўйиб берардилар” – дея хотирлайди Машарипов.

Клублардаги фаолияти ҳақида

Бир неча йил мобайнида “Пахтакор”нинг асосий футболчиси бўлиб келди. Ўзи айнан биз юқорида келтирган интервюсида айтганидек, “шерлар” билан хориж йиғинидан қайтгач унга Тошкентнинг бошқа бир жамоаси “Локомотив”га ўтганини айтишди ва футболчи “темирйўлчилар”га ижарага бериб юборилди. Ўша вақтда қаҳрамонимиз “Пахтакор” сафида анчагина тер тўккан, ўйинлар ўтказиш бўйича ҳам яхши натижа қайд эта олган эди. Миллий чемпионат доирасида 64 учрашувда 10 гол, ички кубокларда 16 ўйинда 1 гол ҳамда ОЧЛда 12 баҳсда 1 гол муаллифи бўлиб улгурган. 

Футболчи янги клубга боргач: "Клубдаги барча йигитлар билан олдиндан танишман. Биринчи кун енгил машғулотлар ўтказдим. Умид қиламанки, "Локомотив"га тезда киришиб кетаман деб ўйлайман. Жамоага фойда келтирсам хурсанд бўламан. "Локомотив" клуби бу мавсум Осиё чемпионлар лигасида ўйнайди. Халқаро мусобақада ўйнаб тажрибам янада ошишига умид қиламан. Бу ҳам ўзимга, ҳам миллий терма жамоага фойдали бўлади. "Локомотив" сафида ОЧЛда ғолиб бўлишни ўз олдимга мақсад қилиб қўяман. Бундан ташқари ўзимни Европага реклама қилишга уринаман. Орзуим келажакда Европа клубларида ўйнаш", - деган фикрларни айтган. Бироқ шундай бўлса-да, Жалолиддин “Пахтакор” уйи эканлиги ва албатта бир кун жамоага қайтишини таъкидлаб ўтган. Унга “Локо”га қандай келиб қолганини сўрашганида “Ростини айтадиган бўлсам, ушбу мавсумда “Локомотив”да ўйнайман, деб ўйламагандим. Бироқ ушбу жамоанинг Чемпионлар Лигасида иштирок этиши ҳамда ўзимнинг ҳам бу орқали халқаро тажрибамни янада орттиришим мумкин эканини ҳисобга олиб, ҳар икки жамоа раҳбарияти ҳам келишган ҳолда ушбу қарорни қабул қилдик. Аслида “Локо” мен билан 2 йилдан буён қизиқар эди. Мана айни дамда ушбу жамоа шарафини ҳимоя қиляпман” – дея таъкидлаган.

“Локомотив” сафидаги илк учрашувини айнан Туркиядаги йиғин доирасида, Туркманистоннинг “Олтин аср” жамоасига қарши ўтказган ҳамда шу баҳсда гол ҳам уришга муваффақ бўлган эди.

Жалолиддин Машарипов учун ўша йилги мавсум ёмон кечмади. Ўзи ўша вақтда интервю берганда қуйидаги фикрларни билдирган эди: “Мавсум бошида “Локомотив”га яхши ниятлар билан ўтган эдим. Бу трансферга розилик беришимга биринчи галда жамоанинг ОЧЛда иштироки этиши сабаб бўлганди. Афсуски, Осиёнинг энг нуфузли мусобақасида гуруҳдан чиқиш насиб қилмади. Бунга биринчи галда ўзимиз сабабчимиз. Ғалаба қозониб турган ўйинларимизнинг сўнгги дақиқаларида гол ўтказиб юбориб, қимматли очколарни бой бердик. Баъзи ҳолатларда омад очиқчасига биздан юз ўгирди. Ўзи шундай ҳолатлар бўлади, сиз қанчалик истасангиз ҳам тўп дарвозага кирмайди. Ана шу жиҳатларини инобатга олсак, мавсумдан тўлиқ қониқиш ҳосил қилдик, деб айта олмайман. Тўғри, ўтган йилги натижани такрорлаб, кубок ва чемпионликни ўзимизда сақлаб қолдик”.

“Локомотив”га 1 йиллик ижара асосида ўтган Жалолиддин Машарипов 2018 йил бошидан бошлаб яна ўзининг собиқ жамоаси – “Пахтакор” сафига ўйнашни давом эттирди. Ўшандан сўнг Машарипов янги мураббий – Шота Арвеладзе қўл остида ўйнади. Бир нарса яққол кўриндики, футболчи ўша даврда чиндан ҳам ўсди, яхшигина тажриба орттирди. Осиё чемпионлар лигасида “Эйр Форс” жамоаси билан ўйинда Криштиану Роналду каби чалқанча услубда ҳам гол уришга эришди. “Чалқанча услубдаги гол? Нима бундай голларни фақат Роналду урадими? Биз ҳам бундай гол кирита оламиз” – деган эди ўша баҳсдан кейинги флеш-интервюда.

Футболчи ҳақида бу йилнинг ёзида турли хабарлар чиқа бошлади. Машарипов Туркиянинг “Трабзонспор” жамоаси эътиборига тушиб қолгани ҳақида миш-мишлар тарқалди. Турли манбаларда эса футболчи учун таклиф этилаётган пул ҳақида айтилса, яна аллақаердадир Шота Арвеладзенинг бу трансферга розилик бермагани айтилди. Ушбу гап-сўзлар ҳақида Машариповнинг ўзи: "Шота Арвеладзе бу ерда қандай фаолият олиб борганини яхши биламан, у ҳам борини берган. Бироқ менга ҳали ҳам аниқ таклиф билан чиқишмади. Фақатгина миш-мишларни эшитяпман, аммо клубдагилар трансфер ҳақида ҳеч нима дейишмади. Европага кетишни истайман. Лекин бунинг учун қайсидир клуб менга таклиф билан чиқиши керак" – дея таъкидлади. 

Охирги чиқаётган хабарларда эса Жалолни Саудия Арабистонининг “Ал Наср” жамоаси харид қилиши айтилмоқда. Вазият қандай бўлишини эса вақт кўрсатади, албатта. 

Терма жамоадаги фаолияти ҳақида

Жалолиддин Машарипов Ўзбекистоннинг турли ёшдаги терма жамоаларида ўйнаган ва 2018 йил ЖЧ саралашидан аввал, Тошкентда Эрон термасига қарши ўйинда ўз дебютини нишонлаган. Кейинчалик эса Осиё кубогида ҳам терма жамоамизнинг асосий футболчиси сифатида иштирок этди. Айнан ўзи шу мусобақани эслар экан “Осиё кубогида чиройли ўйин намойиш қилиб, мухлисларни хурсанд қилмоқчи эдик. Асосий мақсадимиз бош совринни юртимизга олиб келиш эди. Афсуски, бу натижага эриша олмадик. Лекин ёмон ўйнамадик, деб ҳисоблайман. Япония, Австралия каби терма жамоаларга муносиб қаршилик кўрсатдик. Мухлисларга ҳам ўйинимиз ёқди, деб ўйлайман. Ижтимоий тармоқлар орқали кўплаб ижобий фикрларни қабул қиляпмиз. Бизни мусобақа давомида қўллаб-қувватлаб турган барчага миннатдорчилик билдирамиз. Эндиликда Жаҳон чемпионати саралашида ижобий натижа қайд этиб, халқимизнинг азалий орзусини амалга оширишга интилмоқчимиз. Умид қиламан, бунинг уддасидан чиқа оламиз” – деган фикрларни билдирган эди.

Фаолиятидаги қизиқ жараёнлар: 6 ойлик дисквалификация, Жалолиддиннинг финтига Купернинг муносабати

Жалолиддин Машариповнинг фаолиятида шундай ҳолатлар бўлганки, футболчи ўзи учун салбий жиҳатга ишлаши мумкин бўлган ҳолатларни ҳам бошидан ўтказган. Лекин шундай бўлса-да, тушкунликка тушмасдан олдинга интилаверди. 

Ўзбекистон терма жамоаси ўртоқлик ўйинларидан маълум вақт дисквалификацияга учраб ҳам олди. Ўзидан бу ҳақида сўралганида футболчи: “Ўйин тугади, ютқаздик. Захира ўриндиғида сув ичиб ўтиргандим. Якуний ҳуштак чалингач жаҳл билан идишни отиб юбордим. Тўғриси ўша вазиятда ҳакамни кўрмагандим, отган идиш ҳакамнинг яқинига ҳам бормади, 6-7 метр наридан ўтиб кетди. У эса менга улоқтирди деб ўйлади шекилли қизил карточка кўрсатди” – деб жавоб берган эди. 

Осиё кубоги-2019. Ўзбекистон терма жамоасининг гуруҳ босқичидаги дастлабки ўйини Уммон МТЖга қарши бўлган эди ва ўша баҳсда Жалолиддин Машарипов Роналдино услубида финт ишлатгани кўпчиликнинг ёдида бўлса керак. Кейинчалик, терма жамоамизнинг ўша вақтдаги мураббийи Эктор Купер Машариповга бундай финт ишлатиш керак эмаслигини айтгани ҳақида гап-сўзлар тарқалган эди. Футболчининг ўзи бу ҳақида: “У бунга жуда яхши муносабатда. Менинг 6 ойлик дисквалификациям бўлганлиги сабаб, у мени “Пахтакор”даги ўйинларимни кузатди ва шу орқали терма жамоага чақирди. Миллий терма жамоада ҳам клубимдаги каби ўйин намойиш этишимни сўради. “Тўп йўқотишдан қўрқмагин” деб айтди. Бу албатта менда ўзимга бўлган ишончни кўтарди. Аммо, биринчи ўйинда натижа муҳим бўлгани сабаб ҳимояга ҳам ёрдам бериб турдим” – дея жавоб берган эди.

Шахсий ҳаёти

2018 йилнинг 6 декабрь куни футболчи турмуш қурди. 2019 йилнинг 8 сентябрида эса Машариповлар оиласида ўғил фарзанд дунёга келди. 

Ўзбек футболи иқтидорларга бой. Жалолиддин ҳам айнан шундай футболчи. Хоразмлик чарм тўп устасини Ўзбекистон терма жамоаси, ўзи ўйнаган клубларга фойдаси ҳамиша теккан ва бундан кейин ҳам шундай бўлишига умид қиламиз. Унинг легионерга айланадиган вақти келди деб бемалол айтиш мумкин. Ҳар не бўлганда ҳам Жалолиддинга омад тилаймиз!

Оғабек Самисов тайёрлади