“Бир футболчи тарихи”. 15 ёшигача баскетбол билан шуғулланган Лаутаро Мартинес ҳақида

Катта авлод вакиллари балки бу мамлакатни Марадона билан эслар, бироқ ҳозирги кунда Лео Аргентинанинг тимсоли. Ушбу давлат тўғрисида Википедиядан кўп маълумотлар олиш мумкин, бироқ футбол деганда барибир эсга ўтмишдаги ва ҳозирги кундаги афсоналар келаверади. Серхио Агуеро, Хавьер Маскерано, Гонсало Игуаин каби футболчилардан кейин ҳам у ерда иқтидорлар етишиб чиқаверади. Ўтган йили ёзги трансферлар ойнасида “Барселона”га ўтишга жуда яқин келган, бироз вақтдан сўнг “Реал Мадрид”га трансфер қилиниши ҳақида хабарлар чиққан Лаутаро Мартинес – бизнинг бугунги қаҳрамонимиз. 

Лаутаро Мартинес – ким ўзи у?

Лаутаро Хавер Мартинес 1997 йилнинг 22 август куни Буенос-Айрес провинсиясининг Баия-Бланка шаҳрида туғилган. Қаҳрамонимиз 15 ёшигача баскетбол билан шуғулланган. Кейинчалик эса футболни танлади ҳамда маҳаллий “Лайнерс” жамоаси сафига бориб қўшилди. Унинг отаси ҳам профессионал футболчи сифатида айнан шу жамоада тўп тепган. 

Клублардаги фаолияти ҳақида

17 ёшида футболчи Авельянеданинг “Расинг” жамоасига кўчиб ўтди. Ўша вақтлари футболчи бор эътиборини ёшлар жамоасига қаратди. 64 учрашувда 53 та тўп киритган футболчи ҳали Аргентина чемпионатида дебют қилмасиданоқ турли нашрлар у ҳақида ёзишни бошлади ва Европанинг бир қатор жамоалари эътиборига ҳам тушишга улгурди.  

“Расинг” сафидаги дебютини 18 ёшида нишонлади. 2015 йилнинг 1 ноябр куни “Крузеро дел Норте” жамоасига қарши учрашувда футболчи захирадан ўйинга қўшилди. "Мен бундай вақтли дебют қилиб, гол уришимни ҳеч ҳам кутмагандим. Ҳали ёш бола пайтим форвард позициясида ўйнаганман. Лекин мураббий фаолроқ бўлишимни талаб қиларди. У мен худди ёшлар жамоаси тўп тепётгандек ҳаракатланишимни сўрарди”, — дея ёдга олди Лаутаро Мартинес дебютидан сўнг. Ўша учрашув футболчи учун мавсумдаги илк учрашув бўлиб қолди. 2016 йилги мавсумда эса 3 ўйинда майдонга тушди ҳамда биринчи голини ҳам уришга эришди. “Ҳуракан” жамоаси билан бўлган баҳсда Лаутаро дебют голини урди. 2016/17 йилги мавсумда қаҳрамонимиз жами 23 учрашувда иштирок этиб, 9 маротаба тўп киритишга муваффақ бўлди. 2017 йилнинг сўнггида унга бир қатор жамоалардан таклифлар туша бошлади. Жумладан, “Атлетико”, “Барселона”, “Монако” каби клублар футболчини о;з сафига қўшиб олмоқчи бўлди.  

2018 йилнинг 28 феврал куни Мартинес Либертадорес Кубоги доирасидаги Бразилиянинг “Крузейро” жамоаси билан бўлган баҳсда хет-трик қайд этди. Шундан сўнг, футболчи билан Италиянинг “Интер” жамоаси ҳам қизиқа бошлади. 2018 йилнинг ёзида эса Лаутаро миланликлар билан 5 йиллик шартномага имзо чекди ҳамда “Интер” сафига кўчиб ўтди. Трансфер суммаси 25 миллион еврони ташкил этди. Италия А Сериясидаги илк учрашувини “Сассуоло”га қарши ўйинда ўтказди. 29 сентйраб куни “Каляри” жамоаси билан бўлган баҳсда Лаутаро миланликлар сафидаги илк голини урди. Бир неча учрашувлардаги фаол ҳаракатлари, голлар урганига қарамай (“Наполи”, “Фиорентина” жамоаларига қарши баҳсда голлар урган) Мартинес захира футболчиси бўлиб қолаверди. Лаутаро 2019 йилги илк учрашув – “Беневенто”га қарши ўйинда дубл қайд эта олди. “Милан дербиси”да футболчи бир гол ва бир ассистни амалга оширган бўлса-да, барибир асосий таркиб футболчисига айлана олмади. Мавсум сўнггида “Интер” Чемпионлар лигасига йўлланма олди. Бош мураббийлик ўрнига эса Антонио Конте келди. Мартинес эса янги мавсумда ЕЧЛ доирасида “Славия” ҳамда “Барселона”га қарши учрашувларда голлар уришга муваффақ бўлди.  

Италия А Сериясининг 2020/21 йилги мавсумидаги 15-тур доирасида бўлиб ўтган “Кротоне”га қарши ўйинда Мартинес хет-трик муаллифига айланди. Ўйиндан сўнг футболчининг ўзи: “Хет-трик? Бу учун хурсандман. Доимо жамоа учун астойдил ҳаракат қиламан. Учта голимни оиламга, аниқроғи яқинда дунёга келадиган қизимга ва албатта, рафиқам Августинага бағишлайман. Бироқ, мен учун асосийси голлар эмас, балки клубнинг ғалабасидир. Чемпион бўлиш учун курашишда давом этамиз” – дея таъкидлаган эди.

Ёзги трансферлар ойнаси очиқ вақтида футболчининг “Барселона” сафига ўтиши ҳақида хабарлар чиқди. Ушбу хабарлар сўниб, футболчи миланликлар таркибида фаолиятини давом эттираётган вақтда берган интервюсида: “Интер” – менинг уйим. Бу клуб мен учун жуда катта аҳамиятга эга. Бу ерда мухлислар мен билан ҳар доим илиқ муносабатда бўлиб келишади, улар ажойиб. Шундай экан, мен бор кучим билан меҳнат қилиб, майдонда боримни бериб, “Интер” либосига лойиқ бўлишга ҳаракат қиламан” – деган эди.

Терма жамоадаги фаолияти 

2017 йилда Мартинес Аргентина ёшлар терма жамоаси таркибида Эквадордаги Жанубий Америка ёшлар чемпионатида иштирок этди. Турнирда у Перу, Боливия, Колумбия, Бразилия, Эквадор, Венесуела ва Уругвай терма жамоаларига қарши ўйинларда қатнашди. Лаутаро мазкур мусобақада бешта гол урди. Шунингдек, ўша йили Мартинес Жанубий Кореяда бўлиб ўтган ёшлар ўртасидаги жаҳон чемпионатида иштирок этди. Гвинея, Англия ва Жанубий Корея терма жамоаларига қарши о'йинларда қатнашди. Гвинеяликларга қарши дуелда Лаутаро дубл муаллифига айланди.

Аргентинанинг асосий терма жамоасидаги дебютини эса 2018 йилнинг март ойида Испанияга қарши бўлиб ўтган ўртоқлик ўйинида нишонлади. 11 октябр куни Ироқ термасига қарши баҳсда эса футболчи терма жамоаси сафидаги илк голини урди. Мартинес 2019 йили Бразилияда бўлиб ўтган Америка Кубогида ҳам иштирок этди. Турнир давомида Парагвай, Қатар, Венесуела ва Бразилия терма жамоаларига қарши ўйинларда қатнашиб, қатарликлар ҳамда венесуелаликларга қарши учрашувларда гол урди. 

Аргентиналик футболчи Эрнан Креспо Лаутаро ҳақида “Биз аллақачон Мауро Икарди ва Пауло Дибала ҳақида билардик. Лаутаро Мартинеснинг нималарга қодирлигини энди биляпмиз. Лаутаро янги Серхио Агуэрога айланиши мумки. Унда Агуэроникидек тезкор дриблинг йўқ, аммо у – Кундан кўра жамоавий ўйинчи. У майдондаги ўрнини тез-тез ўзгартириб, рақибларни чалғитади. Лаутаро доим ҳаракатда, шунинг учун у марказий ҳужумчи ролида ҳам ёки Ромелу Лукаку сингари форвард билан шерикликда ҳам ўйнай олади. Ҳатто у 3 кишилик ҳужум чизиғида ҳам ўзини кўрсатиши мумкин. Менга унинг майдондаги фикрлаши ёқади” – деган фикрларни айтган эди. 

Шахсий ҳаёти

Лаутаро Мартинес Инстаграм тармоғида ўзи ва севган қизи билан тушган суратларини эълон қилиб туради.

Агустинанинг ўзи Инстаграмда жуфтлик “янги меҳмон” кутаётгани ҳақида пост қолдирган.

“Милан”, “Интер”, “Рома” каби жамоалар охирги йилларда Халқаро майдонда ҳам, ички чемпионатда ҳам яхши натижа қайд эта олишмаяпти. Ҳа, айтишингиз мумкин, барчасига “Ювентус”нинг гегемонлиги сабаб дея. Бироқ, мураббийлар кўп нарсани ҳал қилмоқда бугунги кунда. Контенинг “Интер”га келиши, “Юве”ни мураббийлик фаолиятида кам тажрибага эга бўлган Пирло қўлга олиши ҳозирги натижаларга ўз таъсирини ўтказмай қолмаган. Футболчиларни қандай ўйнаши ҳам кўп ҳолларда мураббийларга боғлиқ. Спалеттидан кейин келган Антонио Конте Мартинесни захира футболчисидан асосий таркибнинг ажралмас бўлаги қилиб қўйгани ҳам эътирофга сазовор. Аргентиналик футболчи ҳали ўзини тўлиқ намоён этмаган, деган яхши гумонда бўламиз ва футбол учун яна бир МЕГА ТОП даражадаги иқтидор етишмоқда деймиз.

Оғабек Самисов тайёрлади