Бекободликлар яна Чирчиқда жамланишди

Янги йил байрами муносабати билан кичик таътилга чиққан ўйинчиларнинг барчаси мураббийлар ихтиёрига етиб келишди. Раҳбарият томонидан берилган маълумотларга кўра бу йилги мавсумда жиддий ўзгаришлар бўлиши кутилмаяпти. Ўз навбатида бекободликлар сафида тўп суриш истагидаги футболчилар ҳам Тошкент вилояти индустриал марказига ташриф буюрган. Бироқ Аюбхон Нўъмонов ҳамда Руслан Вагаповлар билан шартномани расмийлаштиришга иккала томон ҳам шошилмаяпти. Сабаби “Металлург” жамоаси ҳали футболчилари билан ўтган йилги ҳисоб-китобларни тўлиқ амалга ошириб улгурмаган. Шу боис шартнома тузишга кўрикдаги ўйинчилар шошилишмаяпти десак, муболаға бўлмайди. Клуб раҳбариятининг маълум қилишича Янги йил арафасида солиқ тўловлари бўйича қарзлар тўлаб бўлинган. Энди навбат футболчилар ҳамда мураббийлар билан ҳисоб-китоб ишлари. Ундан кейин албатта жамоага қўшиладиган ва уни тарк этадиган ўйинчилар билан боғлиқ масалалар ҳам узил-кесил ойдинлашади.

Бу йил “Металлург”ни бир қатор фахрий ўйинчилар тарк этиши эҳтимоли йўқ эмас. Шунингдек, аввал хабар берганимиздек, жамоа тўпурари Шаҳзодбек Нурматов билан Баҳрайннинг “Ал Риффа” жамоаси қизиқаяпти. Ўтган мавсум сермаҳсулликда Нурматовдан қолишмаган Суннатилла Мамадалиев ҳам хориж клубларидан бирига кўрикка кетган. Жамоа ўзгаришлар ҳақида мухлисларимизга тез орада яна маълумотлар бериб борамиз.