Бахтиёр Ашурматов: "Ўз майдонимизда учта ўйинда атиги 2 очкони олиш, ёмон натижа"

- Биринчи бўлимдаги ўйинимиздан умуман кўнглим тўлмади, мухлислар ҳам норози бўлишди. Йигитлар ўйинга киришиб кетиша олишмади, "Бунёдкор" жамоаси тўпни яхши назорат қилиб, тезкор футбол кўрсатди. Уларнинг ўйинига мослашиш анча қийин кечди. Бунинг оқибатида тайм охирларида гол ўтказиб юбордик.

Танаффусдан кейин ўйинимиз анча жонланиб, ҳатто ҳисобда олдинга ҳам чиқиб олгандик. Иккинчи бўлимдаги ўйинимиз мухлисларга ёқди, деб ўйлайман. Лекин яна ўша ҳимоядаги оддий хато сабабли рақиб жамоа ҳисобни тенглаштирди. Афсуски, ўз уйимизда қимматли бўлган 2 очкони йўқотдик. Ўз майдонимиздаги учта ўйинда атиги 2 очкони киритиш, бу биз учун ёмон натижа. Кейинги ўйинимиз яна бир тезкор жамоа "Насаф" билан бўлиб ўтади, мухлислар далдаси бизга сув ва ҳаводек зарур, - деди мутахассис.