Ахрол Иноятовнинг 70 ёшлик юбилейи муносабати билан тадбир ўтказилди

Ахрол Иноятовни 70 ёшлик юбилейи билан табриклаш мақсадида ушбу тадбирга Ўзбекистон Футбол Федерацияси президенти Мираброр Усмонов, ЎФФ биринчи вице-президенти Сардор Рахматуллаев, ЎзПФЛ бош директори Фарҳод Магометов, ЎФФ қошидаги футбол фахрийлари кенгаши раиси Наримон Жалолов, Ўзбекистон миллий терма жамоаси бош мураббийи Миржалол Қосимов, миллий терма жамоа футболчилари, Олий Лига клублари бош мураббийлари ва ўзбек футболида ўз ўрнига эга бўлган бошқа кўплаб инсонлар қатнашди.

ЎФФ президенти Мираброр Усмонов Ахрол Иноятовни таваллуд айёми билан муборакбод этиб, унга узоқ умр, саломатлик тилади ва эсдалик совғаларини топширди. Шундан сўнг табриклаш учун “Пахтакор” бош мураббийи Самвел Бабаян, “Нефтчи” клуби собиқ бош мураббийи, ҳозирда “Бунёдкор”да фаолият олиб бораётган Юрий Саркисян, “Нефтчи” вакиллари - Тохир Копадзе, Мурод Исмоилов, “Бунёдкор” бош мураббийи Сергей Лучшан, “Олмалиқ” бош мураббийи Игор Шквирин, шунингдек, “Локомотив”, “Насаф” ва бошқа клублар вакиллари ҳам сўзга чиқиб, ўз эсдалик совғаларини топширишди.

Тадбирда иштирок этган миллий терма жамоа футболчилари ва мураббийлар штабига эса Жаҳон чемпионати саралаш ўйинларида мувафақиятли иштирок этиб, ўзбек халқини хурсанд қилишларида омадлар тиланди.