Асрор Алиқулов: "Рўза тутиб, футбол ўйнаш қийин. Вақтни ПФЛ белгилайди"

Асрор Алиқулов: "Бугун яхши ўйин кўрсата олмадик. Тўп назорати кўпинча рақиб томонда бўлди. Агрессивлик етишмади. Тез ўйнаш бўйича кўрсатма бергандик, аммо йигитлар буни уддалай олишмади.

- Дуранг адолатли натижами?

- Шундай. Бироқ ҳар қандай хато қимматга тушиши мумкин эди. Шу сабабли баҳс охиригача босимда бўлдик.

- Жасур Холтўраев асосий таркибда майдонга тушмади. Бу тактик юришми ёки унда жароҳат борми?

- Ҳа, унда кичик шикастланиш бор эди. Тактикада ҳам ўзгариш бўлди. Қанотлардан узатмаларни кўпайтирдик, аммо ўйлаганимиздек ҳужумларни ташкил эта олмадик.

- Содиқовнинг ўйинидан қониқдингизми?

- Йўқ, қониқмадим. Навбатдаги баҳсларда ўзини кўрсатади деб умид қиламан.

- "Қизилқум" учта ўйиндан бери биринчи бўлимда майдонда сайр қилаётгандек туйилмоқда. 

- Жамоамизда ёши катта футболчилар кўп, уларга тушинтиришга ҳаракат қиляпмиз. Бу кўпроқ футболчиларнинг ўзига боғлиқ. Улар ўз фамилияси учун ҳаракат қилиши лозим.

- Ўйинларни бу вақтга қўйиш тўғрими? Баъзи мураббийлар баҳслар 19:00дан кейин бўлса яхши эди деб айтишмоқда.

- Бу ҳақида кўп гапирмоқчи эмасман. Рўза тутиб, футбол ўйнаш қийин. Вақтни ПФЛ белгилайди. Ҳамма шундай ўйнаяпти. Футболчилар ўз вазифасини профессионаллардек адо этишни хоҳлар эдим.

- Ўринбосарлар таркибида ҳам яхши футболчилар борми? Уларга имконият беряпсизми? Масалан, Диёр Раҳматуллаев.

- Диёрнинг ўйинидан мамнунмиз. У "Пахтакор"га қарши баҳсда майдонга тушди. Бироқ ҳали ёшлигини ҳисобга олиб, тажрибалироқ футболчига имконият бердик.