"Арсенал" ҳали ҳам фаворит номига лойиқми?

Бироқ "тўпотарлар"нинг "кетмони яна учармикин"? Қизиғи, айнан "Реал"ни мусобақадан чиқариб юборгач, "Арсенал" нафақат ярим финал балки мусобақа ғолиблиги учун ҳам чинакам фаворит сифатида қаралаётганди, лекин Лондондаги ўша оқшом... Бугун "арсеналчилар" "Мадрид" таслим этилгани тасодиф ёки шунчаки Анчелоттининг даври тугаши билан эмас, айнан инглизларнинг яхши ўйини самараси эканлигини исботлаши зарур.

ПСЖ

1. Лондонда ғалаба қозонган ПСЖ кейин "Страсбур"га ютқазиб берди

Чемпионлар Лигаси ярим финал дастлабки ўйинидан ПСЖ кичик бўлсада, ғалаба билан қайтди. "Арсенал" "Эмирейтс"да (1:0) таслим этилди. Бунинг учун нафақат гол урган Дембелега, балки дарвозада ишончли ўйин кўрсатган Доннаруммага ҳам алоҳида миннатдорчилик билдириб қўйиш керак. Жавоб баҳсига ҳам ПСЖ тўлиқ концентрация билан етиб келмоқда ва бу йўлда чемпионат баҳсларини бир четга суриб турибди. У ерда вазият шунчалик осойиштаки, Париж "Страсбур"га ҳам ютқазиб (1:2) бераверди. Ҳозир асосийси "Парк де Пренс"да "Арсенал"ни "чиройли меҳмон қилиш".

2. Усмон Дембеле "Арсенал"га қарши ўйинга тайёр

ПСЖ ўйинга таркибда ҳеч қандай муаммосиз етиб келмоқда. Энг катта қўрқув Дембеле билан боғлиқ эди, "канонирлар"га қарши биринчи учрашувда футболчи кичик жароҳат олганди, аммо душанба куни вингер умумий гуруҳга қайтди. "Страсбур" билан баҳсда Люка Эрнандес ва Ли Кан Ин ҳам енгил жароҳат олгандек бўлди, лекин ҳар икки футболчи асосий таркибнинг муҳим футболчилари, деб бўлмайди. Айниқса ЕЧЛнинг бу босқичида. Асосий таркиб эса Лондондагидан кескин фарқ қилмаса керак.

3. ПСЖ Чемпионлар Лигаси доирасидаги уй учрашувларида "биринчи рақам" бўлиб ўйнайди

Парижликлар мазкур мусобақа доирасида ўз уйларидаги натижалари билан унчалик ҳам мақтана олишмайди: ПСВ билан 1:1, "Атлетико" билан 1:2 ва "Ливерпул"га қарши 0:1. Фақатгина натижага эмас, ўйин картинасига қараб баҳо берадиган бўлса, Луис Энрике шогирдлари — мусобақанинг энг яхши жамоаларидан биридир. Рақиб ким бўлса ҳам, у "Ливерпуль" бўладими, "Астон Вилла" (3:1), "Манчестер Сити" (4:2) ёки "Брест" (7:0) ва "Жирона" (1:0), парижликлар ҳужуми кучини ўзида ҳис қилиб улгурган. Бу эса кўплаб зарбаларга замин яратган (ўртача ҳар ўйинда 25.1) ва эҳтимолий голлар (умумий 18.7 xGA) кўрсатгичи. Ҳозирда ПСЖ ҳисобни ушлаб қолиш учун ўйнаса ҳам бўлади, лекин Луис Энрике бунга жазм қилармикин?

Арсенал

1. "Арсенал" ПСЖга қарши ўйиндан аввал "Борнмут"га имкониятни бой берди

АПЛда анча дадил мавсум ўтказаётган жамоа Микель Артетани ҳафа қилди (1:2). Натижада, лондонликлар қаторасига учинчи ўйинда ҳам ғалаба қозона олмади ПСЖга қарши ўйин (0:1) ва "Кристал Пэлас" билан дуранг (2:2). Аслида "канонирлар" учун мавсумнинг ҳозирги қисмига келиб, Чемпионлар Лигаси асосий мусобақага айланган. АПЛда "Арсенал" ТОП-5дан тушиб кетиш учун анча "тер тўкиши" керак бўлади. Шундай экан, бор куч ва имкониятлар Парижга қарши иккинчи тўқнашувга ташланган. Мадридда бу иш амалга ошди, Фанцияда қандай бўларкин вақт кўрсатади. Бироқ ҳар икки вазиятнинг камида битта катта фарқи бор. "Реал" "Сантьяго Бернабеу"да мағлубият шарт бўлмаган вазиятда таслим этилди, ПСЖ билан эса аксинча, ғалабадан бошқа натижа қаноатлантирмайди. Бу эса қўшимча босим дегани

2. Юрриен Тимбер сўроқ остида, Парти дисквалификациядан қайтмоқда

Микель Артета учрашувда Юрриен Тимбер иштироки борасидаги вазиятни шубҳа остида қолдирди. Ўнг қанот вакили "Борнмут" билан ўйинни ўтказиб юборди ва унинг ҳолати бўйича ҳамон аниқ маълумот йўқ. Энг ёмон вариантда ўнгда Бен Уайт майдонга тушиб, Хвича Кварацхелияга "байрам" бўлиши мумкин. Таянч зонага айтганимиздек, Томас Парти қайтади. Айнан унинг зонасидан биринчи ўйинда амалда ол юзага келди. Бу эса Деклан Райс ва Мартин Эдегорга яратувчанликда эркинроқ бўлиш имконини беради. "Алдамчи тўққизлик" позциясида Микель Меринони кўрсак керак.

3. "Арсенал" агрессивроқ ҳаракат қилиши ва ўзининг устун жиҳатларидан унумлироқ фойдаланиши зарур

АПЛда "канонирлар" стандартлардан унумли фойдаланиш оқибатида 14 та гол урган ва "Кристал Пэлас"дан кейин иккинчи энг яхши натижага эга. ЕЧЛда эса Микель Артета жамоаси 5 бор имкониятларини голга айлантирди ва кучли учликдан ўрин олди. Деклан Райснинг "Реал" дарвозасига дублини ҳали унутмаган бўлсангиз керак. ПСЖ билан биринчи ўйинда "Арсенал" рақиб ярим майдонида унчалик фаол бўлмади ва деярли хавфли стандартлар ишлолмади (бор йўғи 3 та бурчак зарбаси). Микель Артета "Борнмут"га имконият бой берилгач, жамоа бу борада тўғри хулоса чиқариб, бор аламини ПСЖдан олишига ваъда берди.

Амалда, аниқроғи майдонда ишлар қандай тус олади тунда гувоҳи бўламиз. Кеча ўйиндан аввал аксарият мутахассис ва мухлислар "Барселона" барибир улоқни илиб кетишини тахмин қилганди. Аммо, лекин, бироқ... Драматик учрашувда омад миланликларга кулиброқ боқди. Шундай экан, бугунги учрашувни ҳам ўтказиб юбормаган маъқул.

TerminaTor