Анвар Ғофуров Ўзбекистон - Эрон учрашувидан олдин: "Форслар билан ўйинда ҳақиқий камчиликларимизни кўришимиз мумкин"

- Эрон билан ўйинлар доим принципиал бўлган. Эртанги баҳс ҳам шуни давоми бўладими? Умуман ўйиндан нима кутяпсиз?

- Албаттта кучли ва яхши рақибга қарши учрашув кутмоқда. Шубҳасиз икки жамоа ҳам яхши тайёргарлик кўришади. Чунки ҳар битта хато қимматга тушиши мумкин. - Ўйлашимча, икки жамоа ҳам учрашувни эҳтиёткорлик билан бошлашади. Стадионга келган ишқибозлар футболчиларни олдинга чорлашлари аниқ. Айнан мухлисларимиз футболчиларимизга қўшимча куч беришади, 12 ўйинчи бўлишади. 

- Ўзбекистон терма жамоасининг бор имкониятлари юзага чиқдими, ютуқлар фонида камчиликлар ҳам кўриняптими? Эрон билан ўйинда қайси томонлама эҳтиёткор бўлишимиз керак?

- Ростини айтганда Эрон билан ўйинда ҳақиқий камчиликларимизни кўришимиз мумкин. Ўмон, Туркманистон, Тожикистон терма жамоаларини ҳурмат қиламан. Лекин биз бу ўйинларда тажрибалироқ  ва кучлироқ кўриндик. Терма жамоамизда ўйинни янада яхшилаш учун потенциал бор, дея оламан. 

- Эронни ютиш орқали Осиё кубоги олдидан Катанец ишига баҳо бера оламизми? Қайсидир маънода Осиё кубогида Австралияни ютишимизга ишонч берадими?

- Катанецнинг ишига мен баҳо бермайман. Чунки Катанецни яхши мураббий, деб ҳисоблайман. Ҳозирги футболда ҳар бир жамоа исталган рақибини ютиши мумкин. Бугунги футбол бошқа даражада. Масалан сўнгги мундиалдаги натижаларга қарасак ҳам кўрамиз. Саудия Арабистони - Аргентина 2:1, Япония -  Испания 2:1, Германия - Япония 1:2, Жанубий Корея - Португалия 2:1 ва ҳоказо. Осиёнинг 5та жамоасидан 3таси гуруҳдан чиқди. Терма жамоамизга омад тилайман.