Англияда бошланган мавсум ҳақида билишимиз керак бўлган олти янгилик

Янги мавсумда Англияда янгиликлар киритилган ва биз уларни сизга эслатиб ўтишга қарор қилдик.

ЯНГИ ТИЗИМДАГИ ПЕНАЛЬТИЛАР СЕРИЯСИ

"Арсенал" ҳамда "Челси" ўртасидаги Англия Суперкубоги учун бўлиб ўтган баҳс эсингиздами. Айнан шу учрашувда пенальтилар сериясининг янги тизими қўлланилди. Яъни, A-B-B-A тизими (А - биринчи жамоа, B - иккинчи жамоа). Серияни бошлаган жамоадан сўнг нуқтага яқинлашган клуб иккита зарба йўллайди, навбатдаги жамоа ҳам шундай бўлади. Энди Англия чемпионат ва кубокларида худди шу тизим қўлланилади.

"ШЎНҒУВЧИЛАР"ГА ЖАЗО

Янги мавсумда жарима зарбаси ишлашни истаган "актёрлар" жиддий жазоланади.

Вазиятлар собиқ футболчи, собиқ мураббий ва собиқ ҳакамдан иборат бўлган гуруҳ томонидан ўрганиб чиқилади. Симуляция қилган футболчи 2 учрашувга четлатилади.

ЧИМГА ТЕГИЛМАСИН

"Лестер Сити" АПЛда чемпион бўлган мавсум майдонидаги ажойиб суратлар билан ҳаммани ҳайрон қолдиргани сир эмас. Зиг-заг чизиқлар, клуб герби ва яна бошқа суратлар. Премьер-лига раҳбарияти ушбу ишларни таъқиқлади ва энди барча майдон чимлари одатий горизонтал чизиқларга эга бўлади. Ушбу қоида УЕФА талабларига ҳам жавоб беради.

КАРАБАО Кубоги

Milk, Littlewoods, Rumbelows, Coca-Cola, Worthington, Carling ва Capital One дан сўнг янги кубок пайдо бўлди: Карабао Кубоги! Кара-нима? Бу Таиланднинг энергетик ичимлик ишлаб чиқарувчи компанияси. Улар Англия Лига Кубоги ҳомийига айланишди ва бу мавсум турнир Карабао Кубоги деб аталади.

ЯНГИ ТЎПЛАР

Янги мавсумда ҳар доимгидек янги тўплардан фойдаланилади. Бу тўпга The Ordem V деб ном беришди. Англия Премьер-лигасида Nike компаниясининг ўн еттинчи тўпи фойдаланилади. 2001 йилда АПЛ Nike билан ҳамкорликни бошлаган эди. Ушбу тўпнинг босими барча жойида бир хил ва аниқ зарбадан сўнг тўп керакли жойга бориб тушади.

Сентябрь бошланиши билан дарвозабонлар тўп ҳаводан йўналишини ўзгартираётганини, ҳужумчилар эса тўп аввалгисидан яхши эканлигини айтишади. Худди аввалги мавсумдагидек.

ФУТБОЛКАДАГИ РАҚАМЛАР

Оддий, лекин муҳим янгилик. Премьер-лиганинг янги логотипи барча рақамларга туширилади. Рақамлар шрифти эса барча жамоада бир хил бўлади.