Андреа Пирло: “АПЛ ва А серия жамоаларидан таклифлар бўлганди, аммо...”

“Ювентус” ёшлар жамоасининг бош мураббийи Андреа Пирло жамоада янги лавозимдаги таассуротлари ҳақида гапирди.

“Мураббийлик фаолиятимни бошлаганимдан хурсандман. Футболчи сифатида ҳис қилган туйғуларни мураббий сифатида ҳам такрорлайман деган умиддаман. 

Янги лавозимда иш бошлашимни сабрсизлик билан кутаяпман. Футболчилик фаолиятимни якунлаганимдан сўнг мен яна шу соҳада иш бошлашим кераклигини тушуниб етдим. “Ювентус”га қайтганимдан жудаям хурсандман.

“Милан”даги 10 йиллик фаолиятимдан кейин мен бу ерга қайтдим ва мени ушбу аҳил оилага қабул қилишди. Бу ердаги футболчилар билан тезда келишиб кетдим. Ўша пайтда Туринни тарк этган бўлсамда, барча билан илиқ алоқаларим сақланиб қолганди. “Милан” билан ўзига хос тарихга эгаман. Аммо у ерда ҳозир мен билан бирга ишлаганлардан деярли ҳеч ким қолмади.

Менга А серия ва АПЛ клубларидан таклифлар бўлганди. Аммо мураббийлик фаолиятмни бошлаш учун “Ювентус” энг тўғри йўл эканлигини тушуниб етдим”, деди Пирло.