Алексей Евстафеев, "Дўстлик" халоскори ва "Қўқон-1912" посбони - Про лига 9-тур лауреатлари

"Championat.asia" сайти талқинига кўра 9-турнинг энг яхши дарвозабони - Ислом Абдуллаев ("Қўқон-1912")

"Қўқон-1912" жамоаси бу турда "Бухоро" меҳмони бўлди. Муросасиз ўтган учрашувда дарвозаларга тўп киритилмади. Ўйин давомида бир нечта хавфли вазиятлар яратган мезбонларга қарши қўқонликлар посбони Ислом Абдуллаев дарвозаси даҳлсизлигини сақлаб қолди. Кипер жамоасини яққол голли вазиятларда қутқариб қолди. Шу сабабли Ислом Абдуллаевни 9-турнинг энг яхши дарвозабони деб топдик. 

"Championat.asia" сайти талқинига кўра 9-турнинг энг яхши футболчиси -   Ҳамидулло Абдуҳамидов ("Дўстлик")

Тошкентнинг "Дўстлик" жамоаси 9-турда "Олимпик Мобиуз"дан устун келди ва мавсумдаги илк ғалабасини қўлга киритди. Бунда жамоанинг ҳужумчиси Ҳамидулло Абдуҳамидовнинг ҳиссаси катта бўлди дея оламиз. У дастлабки голда Шерзод Қодировга ассистентлик қилган бўлса, якунда ғалаба голига муаллифлик қилди. Шубҳасиз Ҳамидулло Абдуҳамидов тур футболчиси номига муносиб ўйин кўрсатди.

"Championat.asia" сайти талқинига кўра 9-турнинг энг яхши мураббийи - Алексей Евстафеев ("Дўстлик")

"Дўстлик" жамоаси янги мураббий Алексей Евстафеевнинг дебютидаёқ 3 очкога эга чиқди. Узоқ кутилган ғалабада янги мураббийлар штабининг муносиб хизмати бор десак муболаға бўлмайди. Қисқа вақтда футболчиларни яхши тайёрлаган мутахассис ўз-ўзидан 9-турнинг энг яхши мураббийи бўлди.