Ўйиндан кейин "Қизилқум" бош мураббийи Акмал Рустамов матбуот анжуманида иштирок этди.
- Ўйин ҳақида фикрингиз?
- Оғир баҳс кечишини кутгандик. Имкониятларимиз бўлди, лекин рақиб дарвозасига йўл топа олмадик. Тақвим ниҳоятда тиғиз, ўйиндан ўйинга футболчиларни тиклаш борасида қийинчиликлар бўляпти. Бизда иккита бир хил таркиб йўқ, шу боис ҳар бир ўйиндан кейин жамоани кейинги баҳсга тайёрлаш биз учун энг муҳим масала бўлиб турибди. Ғалаба қозонишни хоҳлагандик, бунинг учун ҳаракат қилдик, футболчиларга раҳмат айтаман, айниқса қизил карточкадан кейин янаям жонландик. Фақат рақиб ҳимоясини ёриб ўтишнинг имкони бўлмади. Стадионга келиб бизни қўллаб турган мухлисларга раҳмат. Бугун икки очко йўқотдик деб айта оламан.
- Рақиб жуда қўпол ўйнади, лекин "Қизилқум" бунга жавобан индамади. Балки қўполликка қўполлик билан жавоб бериш керакмиди?
- "Хоразм" жамоаси курашларга бой ҳаракат қилишини ўйиндан олдин футболчиларга айтгандим. Биринчи таймдан кейин ҳам шуни такрорладим. "Хоразм" ўзиям футбол ўйнамайди, бировга ҳам ўйнашга бермайдиган жамоа бўлиб туюлди менга. Буни билардик ва чиндан ҳам шундай бўлди.
- Бир очко олдингизми ёки икки очко йўқотдингизми?
- Ҳозиргина айтиб ўтганимдек, биз икки очко йўқотдлик. Рақиб бир киши кам қолгач, тўлиқ ҳимояланди ва ҳимояни ёриб ўтиш қўлимиздан келмади. Биз ютишни хоҳлагандик, лекин ўхшамади.
- Ислом Кенжабоев нима учун захирадан қўшиляпти?
- Ислом жароҳати сабаб бир ой муддатга сафдан чиққанди, энди ўзини тиклаб ўйинларга қайтяпти. Биз футболчиларга 15-20 дақиқа бериб секин-аста қўшиб борамиз. Кейинроқ вақти келганда асосий таркибда тушади. Унинг ҳозирги ҳолати юз фоиз яхши эмас, 20-25 дақиқага кучи етади. Олдинда мавсум узоқ, ўйлайманки, Кенжабоев ўз голлари билан мухлисларни ҳали хурсанд қилади.
- Май ойида старт оладиган Ўзбекистон Кубогида "Қизилқум" олдига мақсад қўйиладими?
- Биз ҳар бир турнирга ҳозирлик кўрамиз. Кубок ўйинида Нукусга борамиз ва у ерда сунъий майдонда ўйнаймиз. Термизга борамиз, масофа узоқ. Таркибда ротация бўлади, ёшларга имкон берамиз, лекин Кубок мусобақасида ҳам курашамиз.
