"Фиорентина" "Интер" меҳмонига айланган учрашувда мезбонлар футболчилари ўз номларини уч маротаба таблога ёздириб қўйишди. Аввалига Мауро Икарди 11 метрлик "нуқта"дан ҳисобни очган бўлса, кейинроқ Шкриньяр ўз дарвозасини ишғол этиб қўйиб мувозанатни тикланишига сабабчи бўлди. Ўйин тугашига яқин эса Икардининг тўп узатмасидан сўнг Д`Амброзио ўйин тақдирини ҳал этган гол муаллифига айланди. Натижада турнинг марказий беллашувида "Интер" турнир жадвалида таъқиб этаётган "Фиорентина"ни очколар сони бўйича қувиб етди.
Қайд этиш керакки, ўйин тенг курашлар остида ўтди. Стефано Пиоли жамоаси учун бу мағлубият мавсумдаги иккинчиси бўлди. Айни пайтда жамоалар 10 очкодан тўплаган ҳолда турнир жадвалида мос равишда 4-5 ўринларни бўлишиб туришибди.
Италия чемпионатининг 6-туридан ўрин олган қолган еттита ўйин бугун ва иккита беллашув эртага ўтказилади.
Бугун бўлиб ўтадиган матчлар орасида энг эътиборга молик ўйин Неаполь ва Туринда ўтади. Охирги ўйинларда муваффақият қозонаётган ва ўйин борасида ҳам кўпчиликда илик таассурот қолдираётган "Парма" Анчелотти бошқарувидаги "Наполи" билан куч синашади.
Филиппо Инзаги қўл остида ўтган турда сенсация қайд этган "Болонья" эса Туринда "Ювентус" меҳмони бўлади. Ўтган ҳафта "Рома"ни мағлуб этган "Болонья" айни пайтда аъло кайфиятда. Жамоа руҳий тарафлама анча ўзига ишонч пайдо қилган. "Ювентус" эса кетма-кет иккита баҳсда Роналдунинг голлари эвазига ғалабаларни тантана қилди. Мазкур баҳсда ҳам гарчи тиғиз тақвим бўлишига қарамасдан Роналду ўйнашини Аллегри эълон қилди. Демак Филиппо Инзаги ҳам Криштиануни зарарсизлантириш режасини алоҳида ишлаб чиқишига тўғри келади. "Болонья" охирги марта Туриндан бундан 7 йил аввал, аниқроғи 2011 йилги мавсумда очко олиб кетишни уддасидан чиққан. Инзаги катта эҳтимол бугун бу ишни такрорлашга умид қилмоқда. Аммо буни уддалаш осон бўлмаслиги аниқ.
Турнир жадвалида ёнма-ён кетаётган "қўшнилар" тўқнашуви — "Удинезе" - "Лацио" баҳси ҳам қизиқарли ўтишига шубҳа йўқ. "Удинезе"нинг "Лацио" билан ўзаро алоҳида ҳисоб-китоби мавжуд. Чунки жамоа 2013 йилдан буён ўз майдонида "Лацио" қаршилигини енгишда муаммоларга дуч келмоқда. Давом этаётган 5 йиллик нохуш серияга чек қўйиш учун ҳам бугун Хулио Велазкез шогирдлари ўзгача ёндошув билан майдонга тушишади. Симоне Инзаги жамоаси эса рақибларини турнир жадвалида ўзларидан узиб кетишларига йўл қўймаслик учун ҳам ғалаба учун курашишлари табиий.
Ди Франческо қўл остида муваффақиятсиз мавсумни бошлаган "Рома" дебютант "Фрозиноне"ни қабул қилади. А Сериянинг бешинчи туридан сўнг 5 очкодан тўплаган жамоалар баҳсида "Аталанта" ва "Торино" ўзаро кураш олиб боришади.
Шунингдек, бугун яна "Женоа" - "Кьево" ва "Кальяри" - "Сампдория" учрашувлари бўлиб ўтади.
Кутилмаганда турнир жадвалининг юқори қисмидан ўрин олиб турган СПАЛ ва "Сассуоло" жамоаларининг ўзаро тўқнашуви ҳам катта қизиқиш уйғотмоқда. Ўтган мавсум катта қийинчиликлар эвазига А Серияда қолган СПАЛ кутилмаганда стартни жуда яхши бошлади. "Сассуоло" ҳам исталган жамоага кутилганидан ҳам кўпроқ бош оғриқ туғдирмоқда. Ўтган мавсумдаги мазкур жамоаларнинг ўзаро ўйинларида дастлаб "Сассуоло" меҳмонда ғалабани расмийлаштирганди. Кейинчалик ўз уйидаги баҳсда эса дуранг қайд этилганди.
Эртага жамоалар қандай тўхтамга келишларини ўйин кўрсатиб беради. Ўтган мавсум билан бу йилги ўйин ўртасидаги асосий фарқ шундаки, жамоалар ўтган йили аутсайдер мақомида тўқнашишган бўлса, эртага етакчи сифатида бу ўйинда майдонга тушишади.
Турнинг сўнгги беллашуви "Эмполи" - "Милан" ўртасида кечади.
