Аввалроқ унда 14 та клуб иштирок этиб, уларнинг ҳар бири икки давра давомида 26 тадан ўйинда майдонга тушиши маълум қилинганди.
Про лига регламентига кўра, мусобақа ғолиби Суперлигага тўғридан-тўғри йўлланмани қўлга киритади. Қолган яримта ўрин учун эса якунда 4 та клуб кураш олиб бориши белгилаб қўйилган. Яъни, мусобақа якунига етгач, 2, 3, 4, 5-ўрин эгалари плей-офф босқичи доирасида майдонга тушади. Бу ўз ўзидан 5-йўлланма учун ҳам кураш кечишини билдиради. Боиси, мавсумни 5-ўринда якунлаган клубда ҳам назарий жиҳатдан Суперлигага йўл олиш имконияти сақлаб қолинади.
Мавсумнинг сўнгги — 26-тур ўйинлари 7-8 ноябрь кунларига тўғри келади. 9-17 ноябрь саналари ФИФА кунлари сифатида белгилаб қўйилган. Шундан келиб чиқиб, плей-офф босқичининг биринчиси 24-25 ноябрь кунлари ўтказилади. Сўнгги учрашув эса 5 декабрга тўғри келади. Қайд этиш керак, 12 декабрь санасида Суперлигага ўтиш ўйини ўтказилади.
Плей-офф босқичида мавсумни нисбатан юқорироқ ўринда якунлаган клубнинг имкониятлари бироз яхшироқ бўлади. Яъни, Про лиганинг иккинчи жамоаси битта ўйиндан иборат плей-оффнинг илк босқичида 5-ўриндан жой олган клубни ўз майдонида қабул қилади. Мусобақани 3-ўринда тугатган клуб эса ўз уйида Про лиганинг тўртинчи клуби билан беллашади. Ҳар икки ўйин ғолиблари Суперлига ўтиш ўйинида ўйнаш имконини берувчи йўлланма учун ўзаро курашади. Ҳал қилувчи беллашув ҳам мавсумни нисбатан юқорироқ ўринда якунлаган клуб майдонида бўлиб ўтади.
Про лига ва Биринчи лига ўртасидаги ҳолат спорт эмас, ҳозирча лицензиялаш принципига кўра тартибга солинади. Яъни, мавсум давомида Про лига талабларини эҳтимолий бажара олмайдиган клуб эгаллаган ўрнига қарамай, мусобақа билан хайрлашади. Биринчи лига иштирокчилари орасидан ҳам Про лиганинг янги аъзоси худди шу кўринишда саралаб олинади. Про лига регламенти билан мазкур ҳавола орқали танишиб олишингиз мумкин.
