03 апр 2019 22:24

Айбек Нурбаев: "Хоразм" қишда кўнгилдагидек йиғин ташкил этолмади"

А Про-Лига 1-туридан ўрин олган “Нефтчи”- “Хоразм” (0:1) учрашувидан сўнг меҳмонлар ҳимоячиси Айбек Нурбаев “championat.asia” сайтига интервью берди.

Ўзбекистон аҳлини, барча футбол мухлисларини Про-Лига мусобақаларининг очилиши билан муборакбод этаман. Бугун “Истиқлол” стадионида очилиш маросими юқори савияда ташкил этилди, ҳар доим давлатимиз мадҳияси янграганда бизда ғурур ва ифтихор туйғуси жўш уради. Барча иштирокчи жамоалар футболчиларига мавсум давомида жароҳатлар олмасдан, мавсумни кўтаринки кайфиятда ўтказишларига тилакдошман.

Бугунги ўйин оғир ўтишини билардик, шундан келиб чиққан ҳолда учрашувга тайёргарлик кўрдик. Қишки йиғин давомида тўғриси айтганда кўнгилдагидек йиғин ташкил этолмадик. Бу ҳолат ўз навбатида жисмоний имкониятларимизни чекламасдан қолмади.

“Нефтчи”ни барчамиз яхши биламиз, кучли ва кўплаб мухлисларига эга бўлган жамоа. Бугун биз жамоамиз аъзолари билан аҳил ҳаракат қилганлигимиз, барча бир-бирини қўллаб-қувватлаб турганлиги сабабли ғалаба қозондик деб ўйлайман.

Бекзод Толибов ёзиб олди.

Манба : championat.asia