Зойир Ҳасанов: "Ёзёвон" майдонда ўз жасоратини, матонатини кўрсатди"

- Бугун беллашувларга бой ва қийин учрашув бўлди. “Зомин” жамоаси яхши ўйин кўрсатишига қарамай, малубиятга учради. Ушбу учрашувдаги мағлубиятни қандай изоҳлайсиз?
- Бизга бу анъана, умуман жамоамизда шундай анъана шаклланган, рақиб ғалаба қозондими, биз уларни олқишлаймиз. Бугун “Ёзёвон” жамоаси майдонда ўз жасоратини, матонатини кўрсатди, якунда қўллаб-қувватлаб турган мухлислари олдида ғалаба қозонишди. Бугунги учрашув ёмон ўтди дея олмайман, аксинча бугун яхши ўйин бўлди. Футбол шунақа ўйин, қайси жамоа гол урса, ўша жамоа ғалаба қозонади.    
 
- “Зомин” жамоаси бугун ҳақиқатдан ҳам яхши майдонда яхши ўйин кўрсатди. Учрашувда шундай вазият бўлдики, деярли ҳамма гол деб ҳисоблаган холатда тўп рақиб дарвозасига кирмади. Умуман бугун жамоангиз кўплаб имкониятларга эга бўлсада, рақиб дарвозасини ишғол эта олмади. Бунинг сабаби нимада деб ўйлайсиз?
- Биз машғулотларда мунтазам жамоавий ўйинни ташкиллаш устида ишлаб келамиз, футболда “якуний қисм” деган тушунча бор, биз бугун яна шу якуний қисмда бир оз оқсадик. Биз бу хатоларимизни билиб олдик, буни устида ишлаймиз. Шунингдек омад ҳам бугун рақибимиз томонида бўлди. Лекин очиғини айтсам, буунги ўйин менга жуда ёқди. Футболчиларимизга шундай ўйин кўрсатишгани учун раҳмат айтаман, худди шу каби рақиб жамоа футболчиларига ҳам, бугун улар курашларга бой, мухлисларга ёқадиган футбол ўйнаб беришди. Шу каби ўйинлар ўйингоҳларга мухлислар ташрифини янада оширади.

- “Зомин” жамоаси ўз олдига қандай мақсадларни қўйган?
- Клубимизнинг мақсадлари биринчи навбатда ПРО-Лига муносиб бўлиш, ПРО-Лигада ўз ўрнига, мавқеига эга бўлишдан иборат. Агар жамоа раҳбарияти менга ишонса, имконият берса келажакда жамоани янада шакллантириб, Суперлигага олиб чиқиш ниятим бор. Фақат бунинг учун вақт керак бўлади, бу тезда амалга ошадиган жараён эмас. Биз ҳаракат қиламиз, изланамиз, ишлашдан тўхтамаймиз, келажакда жамоамизни Суперлига даражасига олиб чиқамиз!    

Бекзод Толибов ёзиб олди.