Воҳид Шодиев: "Янги жамоага тезда киришиб кетдим"

Ўзбекистон чемпионлари кунига икки маҳалдан машғулот ўтказишяпти. Илк хориж йиғинида ҳозирча асосий эътибор жисмоний машқларга қаратиляпти. Режа бўйича, қалдирғочлар БААдаги илк назорат ўйинини 22 январь куни "Ростов" клубига қарши ўтказишади. 25 январда "Динамо" (Москва), 30 январь куни эса "Спартак" (Москва) клублари билан ўзаро муносабатларига ойдинлик киритиб олишади. Биз бугунги машғулотлардан сўнг жамоанинг янги аъзоси, ҳужумчи Воҳид Шодиевдан қисқача интервью олдик.

- Машғулотлар режа асосида ўтказилаяпти, - дейди Бунёдкор ҳужумчиси.  Кунига икки маҳалдан шуғулланаяпмиз. Машғулотлар икки соат вақт мобайнида давом этмоқда. Жамоа беш йилдан бери айнан шу ерда мавсумга тадорик кўрар экан. Шароитлар аъло даражада. Бу ерда кўплаб кўзга кўринган клублар ҳам мавсумга тайёргарлик кўришяпти.

- Янги жамоа, янги муҳитга мослашиб кетиш жараёни қийин кечмаяптими?
- Ҳаммаси жойида. Айтишим мумкинки, янги жамоага тезда киришиб кетдим.

- Янги футболчилар ҳали таркибга қўшилишмадими?
- Йўқ. Лекин бугун-эрта келиши кутиляпти.

- Янги рақамда қайси рақамда майдонга тушишингизни аниқлаб олдингизми?
- Ҳа, 14-рақамни танладим.

Камолиддин Алимов суҳбатлашди