"Водий футболи". "Нефтчи" 14 май куни Тошкентга боради

"Андижон": Дербига тайёргарлик бугундан бошланади

10 май куни “Локомотив” клубига қарши кечган учрашувдан сўнг бош мураббий Эдгар Гесс футболчиларга бир кунлик дам берди. Бугундан жамоамиз Андижонга йиғилиб яна бир муҳим беллашувга тайёргарликни бошлайди.

Олий лиганинг 9-турида “Андижон” жамоаси ўз майдонида “Навбаҳор”ни қабул қилади. Водий дербиси бўлгани боис бу ўйиннинг аҳамияти катта. Чунки жамоалар нечанчи ўринда боришларидан қатъий назар, дербида кураш шиддатли кечади. Учрашувнинг аҳамияти юқорилиги боис дербига тайёргарлик ҳам шунга яраша бўлади.

Бугун куннинг иккинчи ярмидан футболчилар клуб қароргоҳида йиғилиб машғулотларни бошлайдилар. Эслатиб ўтамиз, “Андижон” ва “Навбаҳор” жамоалари ўртасидаги учрашув 16 май куни “Соғлом авлод” стадионида бўлиб ўтади.


"Навбаҳор": Эрматов иккинчи бор ўйинимизда ишлайди

Олий лиганинг 9-турини Андижонда мезбонларга қарши ўтказадиган "Навбаҳор" бугун ушбу учрашувга тайёргарликни бошлайди.

Шамоллаб қолгани туфайли ўтган ўйинни ўтказиб юборган Раббим Ҳасанов бугунги машғулотларда умумий гуруҳда ишлаши кутилмоқда. Бу ҳақда клуб матбуот хизмати хабар берди.

ПФЛ водий дербисига Равшан Эрматов бошчилигидаги ҳакамлар бригадасини тайинлади. Эрматов бу йил "лочинлар" иштирокидаги иккинчи ўйинда ишлайди. Бунгача у 3-турдан ўрин олган "Нефтчи" - "Навбаҳор" ўйинида ҳакамлик қилганди. Ўша учрашув 1:0 ҳисобида Фарғона клубининг ғалабаси билан тугаган эди.


"Нефтчи": 14 май куни Тошкентга борамиз

Чемпионатда мағлубиятсиз иштирок этаётган Фарғонанинг "Нефтчи" клуби навбатдаги ўйинни Тошкентда "Пахтакор"га қарши ўтказади.

Мурод Исмоилов шогирдлари Фарғонадаги ўз базаларида муҳим ўйинга жиддий тайёргарлик олиб боришмоқда. "Шерлар" иштирокидаги ўйинларни кўриб рақиб ҳақида маълумотлар тўпланмоқда.

Клуб матбуот хизматининг хабарига кўра жамоа 14 май куни Тошкентга келади.