Владислав Павленко: «Яхши ўйнадик, аммо гол ура олмадик»

Майдон марказида тўп сураётган легионернинг дастлабки учрашувлардаги ҳаракатлари кўпчилик мухлисларга манзур бўлмоқда. «Сўғдиёна»га қарши ўйинда Павленко гол уриш учун жамоадошларига бир нечта имконият яратиб берди. Шундай бўлсада, мезбонлар жиззахликлар дарвозасига йўл топа олишмади. Учрашув якунига етгач, футболчининг ўйин ҳақидаги фикрлари билан қизиқдик:

- Бугун яхши ўйин намойиш этдик. Лекин, нима сабабдан гол ура олмаганимизни тушунмаяпман. Омадимиз чопмади деб ўйлайман. Гувоҳи бўлганингиздек, ёмон ўйин кўрсатганимиз йўқ. Ҳисобни очиш учун рақиб дарвозаси олдидан кўплаб имкониятларга эга бўлдик. Лекин, вазиятларни голга айлантира олмаганлигимиз сабабли бугунги учрашувда қимматли очколарни бой бердик. Ғалаба қозона олмаганлигимизга балки ишонч етишмагандир. Ахир қандай имкониятлардан фойдаланмадик. Нима сабабдан омадимиз юришмаётганлигини тушуна олмаяпман. Ўйин бошларида вазиятларни голга айлантирганимизда, йирик ҳисобда ҳам ғалаба қозонишимиз мумкин эди, - дейди Павленко.