Виталий Левченко: "Ўзбекистон U-19 Европа жамоасига ўхшайди"

"Ўзбекистон ёшлар терма жамоаси жуда кучли ҳисобланади. Айтиш мумкин бўлса Европа жамоасига ўхшашиб кетади. Умуман бошқача тезлик, умуман бошқача фикрлаш...
 
Осиё чемпионати гуруҳ босқичида Ўзбекистон билан ўйнаймиз. Генерал бўлишни истамаган аскар аскар эмас. Шу боис биз ҳам қитъа чемпионатида Ўзбекистонни мағлуб этишни истаймиз. Агар шогирдларим барча кўрсатмаларимни тўғри бажаришса, бугунгидек таслим бўлишмаса, ғалаба ҳақида гапириш мумкин.

Гуруҳда яна Австралия ва Хитой каби жамоалар ҳам бор. Уларни ҳам ўрганишда давом этаяпмиз. Аммо Ўзбекистон ҳам, Австралия ҳам, Хитой ҳам деярли ҳар ойда Европа жамоалари ва Осиёнинг кучли жамоаларига қарши ўртоқлик учрашувларини ўтказишади. Афсуски, ҳозирги кунда бизда бундай имконият йўқ.

Бугунги ўйинда ҳакамликка умуман эътирозим йўқ. Улар ўз ишини аъло даражада бажаришди. Ҳакамлар натижага таъсир қилишмади. Уларга бугун 5 баҳо қўяман.

Осиё чемпионатига борадиган таркиб октябрь ойига яқин аниқланади. Ҳали селекция ишлари давом этмоқда.

Эртага Туркманистон билан ўйнаймиз. Ушбу ўйинда таркибимизда ўзгаришлар бўлади. Сабаби бугун футболчиларим катта жисмоний юклама олишди, - дейди Виталий Левченко.   

Нарзулла Сайдуллаев