Вадим Абрамов: "Шомуродовни "Реал" ёки "Барселона"да кўришимиз мумкин"

"Шомуродовнинг "Рома"га ўтганидан хайрон қолмадим, сабаби у "Женоа"дек клубда голлар урди. Терма жамоа устози сифатида Генуя клуби ўйинларини томоша қилдим ва хайрон қолдим. Бу қанчалик кучсиз жамоа эканини ҳис қилдим. Элдор эса ўша ерда ўзини кўрсата олди - молодец. Бу қийин эди. Ҳамма ҳам "Женоа"да ўзини кўрсата олмайди.

Ҳужумчи барибир бошқа футболчиларга боғлиқ. Зарба берадиган нуқтага олиб чиқишмаса гол бўлмайди. "Рома"да эса голлар уриш осон бўлади. Роналдуни "Женоа"га олиб келинг — "Ювентус"даги голлари сонини такрорлай олмайди.

Шомуродовнинг кетма-кет голлар ураётгани Моуриньони эътиборини тортиши аниқ. Аммо гол ураверсанг ҳам таркибга кирмаслигинг мумкин. Сабаби ўзи учун ном қозониб бўлганлар мавжуд. Жеко ёки Жируга адаптацияга вақт берган бўлишарди. Элдордан эса Моуриньо дарҳол натижа кутади. Бундай рақобатда ютиб чиқиши фақат Элдорнинг ўзига боғлиқ. Бунинг учун имкониятлари етарли.

Шомуродовда "Рома"дан ҳам кучли клубда ўйнаб кетиш салоҳияти бор. Элдор ҳеч кимдан кам эмас. Агар унга вазиятлар яратиб беришда муаммо бўлмаса, Шомуродовни "Реал" ва "Барселона" каби клублардан ҳам кўришимиз мумкин. Ҳозир бу фантастик кўриниши мумкин, аммо амалга ошиши мумкин бўлган воқеа», — дейди Абрамов «ВсёПроСпорт» корреспондентига.