Вадим Абрамов: “Кейинги учрашувларда мухлисларга ёқадиган ўйин намойиш қилишга ҳаракат қиламиз”

Ушбу учрашувдан кейин Вадим Абрамов ўйин ҳақидаги фикрларини билдириб ўтди.

"Аввало, мухлислардан бугун намойиш этган ўйинимиз учун узр сўрайман. Йигитлар ўйинга ўзларини рухан кераклича тайёрлай олишмади. Чоғланиш яхши бўлмагани боис, ҳужумкор ва тажовузкор ўйин кўрсата олмадик. Келаси учрашувларда бундай ҳолат бўлмаслигига ҳаракат қиламиз ва анча жиддий муносабатда бўламиз.

Яхшики, иккинчи бўлим сўнггида ўйинимизни бироз жонлантирдик ва ғалаба қозондик. Бугун ўйин амалиётига кўп ҳам эга бўлмаётган бир неча футболчига имкон бердик. Улар қай даражада ишончимни оқлай олишгани ёки олишмаганини ўзлари яхши билишади. Алоҳида тўхталиб ўтишни истамаган бўлардим.

Ислом Тўхтахўжаевни бугун олдинроққа ўтиб ҳаракат қилишига рухсат бердик. У бемалол ҳужумчи ортида ҳаракат қила олади. Лозим бўлса ҳужумда ҳам ўйнатаверамиз.

Келаси учрашувларда анча шиддатлироқ ўйин намойиш қилиб, мухлисларимизни хурсанд қилишга уринамиз", деди Вадим Карленович Абрамов.