Вадим Абрамов: "Иван Нагаев узоқ вақт ўйин амалиётисиз қолиб кетди"
17 авг 2015 22:47
Новости

Вадим Абрамов: "Иван Нагаев узоқ вақт ўйин амалиётисиз қолиб кетди"

"Локомотив" - "Сўғдиёна" (7:0) учрашувидан сўнг ташкил этилган матбуот анжуманида майдон эгалари бош мураббийи Вадим Абрамов қатнашди.

"Бугун ҳисоб ўта йирик бўлди, шунга ишонгандик. Жамоа ўтган ўйиндаги мағлубиятни унутиб майдонга тушди. Йирик ғалабадан хурсандман".

"Сўғдиёна"га қарши кўрсатган ўйинимиз туфайли рақиб деярли имконият ярата олмади. Кейинги ўйинларда ҳам шундай ўйнашга уринамиз".

"Иван Нагаев Қувайтда ўйнаб қайтганида ПФЛдан уни ҳеч бўлмаса ёшлар таркибида ўйнашга рухсат беришини сўраб мурожаат қилдик, аммо бунга имкон беришмади. Иван анча вақт давомида ўйин амалиётига эга бўлмади. Шу боис ҳам уни бугун майдонга туширмадим. Тез орада у яна ўз формасига кириб олади".

"Бобур Йўлдошев жароҳат олиб сафдан чиқди. Менимча тахминан 3 ҳафта давомида майдонга туша олмаса керак. Иккинчи бўлимда йигитларга мухлислар учун ўйнаш кераклигини айтдим. Об-Ҳаво ҳам футболга мос бўлди", - дейди Вадим Абрамов.