U-23 Осиё чемпионати. Равшан Ҳайдаров ОФК сайтига интервью берди

Айни пайтда Ўзбекистон U-23 терма жамоаси Хитойнинг Гуангжоу шаҳрида бўлиб турибди ва гуруҳ ўйинларига тайёргарликни давом эттирмоқда. Футболчиларимиз 9 январь куни Қатарга қарши ўйин билан Осиё чемпионатини бошлашади. Эсингизда бўлса, июлда бўлиб ўтган саралаш босқичи биз учун омадли келиб, вакилларимиз ҳар учала рақиб - Ливан, Непал ва БААни мағлуб этган ҳолда биринчи ўрин билан мусобақа йўлланмасини қўлга киритишганди.

Эндиликда ҳаммамиз шу йигитлардан чемпионатда ҳам ижобий натижа кутмоқдамиз. Жамоа бош мураббийи Равшан Ҳайдаров мусобақа олдидан ОФК расмий сайтига интервью бериб, қуйидаги фикрларни билдирди:

- "Саралашдаги муваффақиятни мусобақанинг финал босқичида ҳам давом эттиришни хоҳлаймиз. Бизнинг мақсад фақат ижобий натижа билан уйга қайтишдир. Саралашдан бери жамоа анча ўсди ва буни ўйинлар орқали кўрсатмоқчимиз".

Маълумки, икки йил аввалги мусобақани Ўзбекистон иккита мағлубият билан бошлаган. Қатарда ўтган айнан шу мусобақада Қатар якунда тўртинчи ўринни олган. Равшан Ҳайдаров масаланинг шу жиҳатига ҳам эътибор қаратди:

- "Биринчи ўйин ҳар доим муҳим бўлиб келган. Қатар ўзига яраша шаклланган жамоа, лекин биз ҳам қараб турмаймиз. Ўйлайманки, бу ўйинда ғалаба биз томонда бўлади. Мураббий сифатида ушбу мусобақада ғолиб чиқа олишимизни сезяпман ва бунинг учун бор кучни ишга соламиз".