Туркиялик дарвозабон терма жамоа ихтиёридан кетиб қолди. У асосий таркибга киритилмаганидан хафа

Аввалроқ мураббий дарвозабон кичик жароҳати боис Болгарияга қарши ўйнамаслиги ва таркибда кучлироқ футболчилар борлигини маълум қилганди.

Беркенинг хатти-ҳаракати ҳаммани ҳайратда қолдирди: у нарсаларини йиғиштириб, Францияга учиб кетган. Туркия футбол федерацияси бу ҳақда қуйидагиларни ёзди:

"Берке Ўзер жамоани ўз ихтиёри билан тарк этди. Таркибдан четда қолганини баҳона қилиб, рухсатсиз. Бундай хатти-ҳаракатларга йўл қўйиб бўлмайди. Интизом, ҳурмат ва жамоавий руҳ — биз ҳеч қачон муросага келмайдиган принциплар".

Футболчининг ўзи ҳаммасини рад қилиб, унга клубга қайтишга рухсат берилганини таъкидлади:

"Мен ўйин учун таркибни кўрдим ва тушундим: терма жамоада қарор қабул қиладиган одамлар ғалаба қозонишни хоҳламайди. Менинг ҳафсалам пир бўлди.

Атмосферани бузишни истамадим, шунинг учун ўйин олдидан мураббийлар штабига ўз фикрларимни бамайлихотир билдирдим. Ўзимни ноқулай ҳис қилганим учун йиғинни тарк этишимга рухсат беришди. Агар ўйнамасам эканман, клубнинг ўйинларига тайёрланишим керак".