Тошкент вилояти дербисида Дилмурод Каримов майдонга тушмайди

Бу Пислегиннинг шу йил ҳисобида “Металлург” иштирокидаги биринчи учрашувни бошқариши бўлади. Мазкур учрашувда “Металлург”га жамоа плеймейкери Дилмурод Каримов ёрдам бера олмайди. У сариқ карточкаларнинг тўпланиб қолганлиги боис майдонга тушмайди.

Бу йил биринчи даврада Олмалиқда бўлиб ўтган учрашувда мезбонлар 2:0 ҳисобида ғалаба қозонишганди. Дониёр Исмоилов ҳамда Фарҳод Тожиевларнинг голлари “Олмалиқ”қа муҳим 3 очкони тақдим этганди.

“Олмалиқ” жамоасига қарши биринчи даврада заҳирадан майдонга тушган Шоҳназар Норбеков иккинчи даврадан эътиборан олмалиқликлар сафида тўп сураяпти. Бу турда у собиқ жамоадошларига қарши майдонга тушиши кутилмоқда.

Пойтахт вилояти жамоалари дербиси 2008 йилдан бошланган. Ўтган давр мобайнида пойтахт вилояти вакиллари бир бирларига қарши 17 та ўйинда рўбарў келишган. Устунлик “Олмалиқ” жамоаси томонида. Кончилар ўтказилган ўйинларнинг 9 тасида зафар қучишган бўлишса, металлургчилар 7 та учрашувда муваффақият қозонишган. Фақат 1 та ўйинда дуранг натижа қайд этилган. Киритилган ва ўтказиб юборилган тўплар фарқи 36:32, “Олмалиқ” жамоаси фойдасига.

Мазкур жамоаларнинг тўқнашувида олмалиқлардан энг кўп гол киритган ўйинчи Мўйдин Мамазулимов бўлиб турибди. Унинг ҳисобида 6 та гол бор. Бекободликлар ҳужумчиси Зоҳид Абдуллаев эса рақиблари дарвозасини 5 марта ишғол этган.

Бекободдаги учрашувларга тўхталадиган бўлсак уларнинг фақат биттасида дуранг натижа қайд этилган. Қолган 7 ўйин бекободликларнинг ғалабаси билан интиҳо топган.

Охирги турда Ғузорда “Шўртан”га имкониятни бой бериб қўйган “Металлург” футболчилари пойтахт вилояти дербисига жиддий тайёргарлик кўраяпти.