Тимур Кападзе: "Мухлисларнинг норозилигини тушунаман"

Биз Тимур Тоҳировичга мурожаат қилиб унинг фикрлари билан қизиқдик.

"Биринчи навбатда мураббийлар штабини тузишим керак. Ундан кейин март ойида бўладиган Сенегал ва Марокаш билан ўртоқлик учрашувлари учун футболчиларнинг кенгайтирилган рўйхатини тақдим этишим керак.

Терма жамоага вақтинчалик бош мураббий бўлганим эълон қилинганидан сўнг мухлислар томонидан эътирозлар бўлди. Бу ҳолатда мухлислар норозилик билдиришгани тушунаман, лекин бу мен учун ҳам кутилмаган ва қандай масъулиятли лавозим бўлганини биламан.

Мени чақириб шу лавозимни вақтинчалик сенга топширишни маъқул кўрдик, дейишганда, мен ҳам ўз фикримни билдириб, бошқа мураббийни қўйишларини айтдим. Чунки, бизда бунга лойиқ мураббийларимиз бор деганимда, ҳозирги кунда Суперлига жамоаларидан мураббийларни МТЖга вақтинчалик таклиф қилиш тўғри бўлмаслигини айтишди. Улар ўз жамоаларини чемпионатга яхши тайёрлаб, бор эътиборларини ўз клубларига қаратишишларини маъқул кўрдик. Сенга келсак, ҳозирда шу учта ўйинга ўзинг МТЖни тайёрлайсан ва кейинчалик хорижлик мутахассис келганидан сўнг, ўзинг унга маслаҳатчи, ёрдамчи мураббий бўлиб қайси футболчи нималарга қодирлигини, қайси амплуада ҳаракатланишини тушунтириб ёрдам берасан. Ва албата ёнида юриб ўзинг ҳам малакангни оширасан. Кейинчалик бу яхши мутахассис бўлишингда ёрдам бўлади, дейишди.

Менга омад тилаган ҳолда ишни бошлашимни айтишди. Менга ишониб, шундай масъулиятли лавозимга муносиб кўришганлиги учун ўз навбатида ЎФФ президенти Раматов Ачилбай Жуманиязовичга ва биринчи вице-президент Умид Аҳмаджоновга миннатдорчилик билдираман.

Насиб қилса қўлимдан келганича терма жамоамиз манфаати учун жонимни бериб ишлайман. Менга берилган ишончни оқлашга ҳаракат қиламан. Мен учун миллий терма жамоамиз ҳар доим барча нарсадан устун турган. Ўзбек футболига ҳар тарафлама тоза, пок,  яхши хизмат қилишда давом этаман. Миллий терма жамоага кимларни жалб қилганимни кенгайтирилган таркиб чиққанидан сўнг билиб оласизлар, - дейди Ўзбекистон терма жамоаси вақтинчалик бош мураббийи Тимур Кападзе.

Жаҳонгир Сотволдиев суҳбатлашди