Тимур Кападзе: "Биринчи ва иккинчи голда йигитлар хатога йўл қўйишди"

- Ўйин ҳақида

- Қизиқарли ўйин бўлди. Ғалаба қозонсак ҳам бўлар эди, лекин рақиб ҳам яхши ҳаракат қилди ва ғалабани илиб кетиши мумкин эди. Режа қилган кўп ишларимиз ўхшади, ўхшамаган нарсалар ҳам бор. Биринчи ва иккинчи голда йигитлар бироз ёшлик қилиб қўйишди. Биринчи голда ҳимоячининг яққол хатоси кўринди. Иккинчи голда эса "жонли девор" хато қилди, жарима зарбаларида "жонли девор" ҳеч қачон ўз жойидан қимирламаслиги керак. Хатоларни кўриб чиқамиз ва анализ қиламиз. Умумий қилиб айтсак, ёмон ўйин ўтказмадик.

- Бош ҳакам Темур Тўхтасинов бугун "Олимпик" футболчиларини ёшроқ бўлгани сабаб, бироз бошқачароқ муомала қилгандек. Сизнинг ушбу ҳолатга фикрингиз қандай?

- Менинг фикримча майдонда ҳамма тенг, агар "Олимпик" жамоасинининг ёшроқлигини ҳисобга олсак, унда ҳакамлар бизга кўпроқ ён босиши керак эди. Ҳакам ҳар доим нейтрал. Майдонда кимдир ёшроқ, кимдир каттароқ деб муносабат қилиниши керак эмас. Ҳакамларни муҳокама қилмайман, уларни назорат қиладиган инсонлар бор.

- "Олимпик" ўйиннинг биринчи дақиқаларидан ўйинга бироз тайёр эмасдек кўринди, шу сабабдан эрта ўзгариш амалга оширдингизми?

- Йигитлар керагидан кўпроқ ушбу ўйин ҳақида ўйлашаётган эди ва шу сабабдан ўйин бошида кўп хатоларга йўл қўйдик. Ёш футболчиларда бундай ҳолат бўлиб туради. Мен уларга хотиржамроқ ўйнаш кераклигини айтдим. Отамуродов эса ўйинга киришиб кета олмади, аввал пенальти кейин яна битта хатога йўл қўйди ва шу сабабдан уни захирага олдим.

- "Олимпик" жамоасининг ҳужум чизиғидаги креативлик фақат Жалолиддиновда кўринмоқда. Ҳужумдаги ранг-баранглик фақат бир футболчига боғланиб қолаётгани нотўғри эмасми?

- Ҳа, Жасур жуда креатив футболчи. Балки сизларга шундай кўринаётгандир, лекин бошқа футболчилар ҳам анча яхши ҳаракат қилишмоқда. Жасур кўпроқ кўзга ташланаяпти холос.

- Жорий мавсум ҳакамларнинг қарори ўйин натижаларига кўп таъсир ўтказмоқда. Сиз футбол ўйнаган даврингиздаги ҳакамлик даражаси билан ҳозирги кундаги ҳакамликни солиштирсак, қанчалик фарқ бор?

- Ҳакамлар таркиби ҳам кўп ўзгармоқда. Ҳозирги кунда ёш ҳакамлар сони ҳам анча кўпайган. Ҳакам хато қилмаслиги керак, лекин улар ҳам инсон ва хатога йўл қўйишади. Эски авлод ҳакамларида тажриба катта эди, ҳозир кўпроқ ёш ҳакамлар ишлашмоқда. Улар ҳам тажриба тўплаб, хато қилмайдиган даражагача етиб келишади. Менимча, ҳозир ҳакамларга ҳозир осонроқ, сабаби VAR тизими ишлаб турибди. Ҳозир ҳакам хатога йўл қўйса, VAR тизими уни тўғирлайди.