Суперлига клублари стадионлари раҳбарлари иштирокида йиғилиш бўлиб ўтди

Ушбу йиғилишда Суперлига клублари стадионларига қўйилган талабларни бажариш юзасидан фикр алмашилди. Мажлисни Ўзбекистон Профессионал Футбол Лигаси Бош директори Омон Ғофуров очиб берди ва Суперлига клублари стадионларига қўйилган талаблар, камчиликлар ва бир қатор муаммолар ҳақида ўз фкирини билдирди.

Йиғилишда сўзга чиққан ЎзПФЛ Бош директори ўринбосари Мирсардор Алимов стадионлар бўйича талаблар бажарилиши қаттиқ назоратга олингани таъкидлади. “Янги мавсумда Суперлигада иштирок этадиган клублар стадионлари талабларга жавоб бериши учун барча камчиликилар бажарилиши керак. Эндиликда, стадионлардаги шароит ва камчиликлар учун клуб жавоб бериши кўзда тутилган. Айни дамда, фақат саноқли стадионлар ОФК талабларига жавоб беради. Кўпчилик стадионларда вазият яхши эмас. Стадионларда ёритгичлар, табло ва чим борасида муаммолар бор”, - дейди ЎзПФЛ Бош директори ўринбосари.

Стадионлар раҳбарлари ҳам, бу борада янги мавсумда барча ишлар бажарилиши, камчиликлар бартараф этилиши борасида ишлар кетаётганлигини таъкидлашди. Йиғилишда, шунингдек, бир нечта бошқа муаммолар ҳам муҳокама қилинди. Стадионлар директорлари чипталар сотуви борасида клуб ва стадион янги тизимни ишга тушириши, турникет ва бошқа технологияларни қўллаш борасида фикр алмашишди.

Ушбу йиғилишдан сўнг иштирокчилар “Пахтакор” ҳамда “Бунёдкор” стадионларига ташриф буюриб, мазкур стадионлардаги инфратузилма ва шароитлар билан яқиндан танишишди.

Йиғилишдан сўнг, Суперлига клублари стадионларини янги мавсумда барча талабларга мос келиши учун амалга ошириладиган ишлари кўриб чиқилиши ва бу борада клублар стадионлари раҳбарияти Профессионал Футбол Лигасига ҳисобот беришлари борасида келишиб олинди.