Суперагент «полапони»

Daly Mail сайти мухбирига берган интервьюсида та­ниқли мутахассис ўз мижозлари билан ишлаш услуби, Поль Погбанинг «МЮ»га қайтиши ва яқин келажакда ёрқин юлдузга айланиши мумкин бўлган ёш иқтидор соҳиблари ҳақида ҳикоя қилди.

«Футбол тарихидаги рекорд трансферни амалга ошириш учун «отнинг калласи»дек юрак керак. Жозе Моуриньо нисбатан шундай хусусията эга шахс», - Мино Райола дангал гапиришни хуш кўради. - «Ҳам­ма гап шундаки, пулни санаб беришнинг ўзи билан иш битмайди. Улкан харажат масъулияти кишига кучли босим ўтказади. Ҳар қандай вазиятда ўз мижозидан тонмаслиги шарт: «Ҳа, бу менинг одатим!». Ана, «Арсенал»­да ҳам етарли маблағ бор. Аммо «отнинг калласи»дек юрак-чи? Албатта, Арсен Венгерни ҳурмат қиламан. Ўз фалсафасидан воз кечмайдиган мураббий. Унинг фикрича, бундай сарф-харажатлар мантиққа зид. Майли, бу Венгернинг фикри. «Реал»­ми? Полнинг жамоа сафидан жой олишини Зидан ҳам жуда хоҳлаганди. Бироқ клубнинг айнан шундай фикрда эканлигига ишончимиз комил эмасди».

*** «Ўйлашимча, «МЮ» эришган ютуқлари билан кифояланиб қолмаслиги, доимо дунёнинг энг кучли клуби бўлиш истагини ёзги трансфер мавсумида яққол намойиш этди. Бунга ҳеч қандай шубҳа йўқ!»

Кўплаб ёрқин юлдузларни жиловлаб олган таниқли агент билан сўнг­ги трансфер мавсуми натижаларини муҳокама қиламиз. У Мино Райо­ла учун ўта шиддатли кечди. Ёзги мавсумда Поль Погбани «Ювентус»дан «МЮ»га «экспорт» қилиш ор­қали янги трансфер рекордини (89 млн. фунт) қайд этди. Бундан ташқари, Златан Ибрагимович, Марио Балотелли ва Гейнрих Мхитарян савдосидан 30 млн. фунт даромад олди.

«Доимо ўз мижозларимга фақат бизга эҳтиёжи бор жамоаларга ўтишимизни таъкидлайман. «МЮ» ҳамиша молиявий ва спортдаги нуфузи жиҳатидан етакчи ўринларда турган. Анчадан буён чемпион бўлолмаётган, ЕЧЛда қатнашмаётган бўлсада, мижозларимга бошқа жамоалардан кўра кўпроқ қизиқиш билдирди».

«Юнайтед»да аввал ҳам менинг мижозим - Серхио Ромеро тўп сурган. «МЮ»нинг Полга қизиқаётгани бизга маълум эди. Шу боис, «Ювентус» билан гаплашдим. Жамоа ЧЛга жиддий тайёргарлик кўриб, Погбани 10 рақами билан сийлаганди. Шу сабаб биз яна бир йилга Туринда қолишга қарор қилдик. Кейин мен кетиш режаси устида ишга киришдим. Ихтиёримизда АПЛдан иккита, бошқа чемпионатлардан ҳам шунча таклиф бор эди.

*** «МЮ» - Полнинг юрагидан жой олган клуб. Вудворд уни бир йил аввал, Моуриньо эса 2 йил аввал, «Челси»ни қабул қилганида ўз жамоасига қўшиб олмоқчи бўлганди. Энди уларнинг йўллари туташди. Ишончим комилки, бу тўғри қарор. Футболчининг ўзи учун «Реал»да ўйнаш осонроқ кечарди. Бироқ мураккаброқ йўл танланди.

*** «Мхитарян масаласи анча жиддий эди. АПЛнинг бошқа бир клуби билан келишиб бўлгандик. Аммо «Дорт­мунд» уни қўйиб юбормади. Кейин «МЮ» харидор бўлди ва савдони шиддат билан олиб борди».

*** «Златан «МЮ»га жуда мос тушади. Унда жасурлик, ғолиблик руҳияти мавжуд. Қўшимчасига, у - юксак маҳорат соҳиби. Ёши 34га чиққан бўлсада, АПЛдаги энг қизиқ баҳслар унга тегишли. Ибранинг Моу билан бирлашгани «Мана, биз «МЮ»миз, беллашадиган борми?», қабилидаги ҳайқириқни эслатади».

Тўғри, Мино ўзининг хушмуомалалиги билан  мақтана олмайди. Аксарият голландияликлар каби ўта чўрткесар шахс. Лекин қувлиги ҳам чакки эмас.

«Инглизларнинг ўзаро ҳол-аҳвол сўрашларини ёқтираман. Агар сиз «ишлар қалай?», деб сўрасангиз, «э-э, унчалик ёмон эмас, бундан баттар ҳам бўлиши мумкин эди», дея жавоб қайтаришади. Хўш, улар нимани назарда тутишади? Голландияда эса қисқагина «яхши» ёки «ёмон» билан чекланишади. Мен - голландман».

Мино Италияда туғилган, лекин болалигида оиласи билан Голландия­га кўчиб ўтган. Аслида механик бўлган отаси бувисининг кўмагида ресторан очиб, шахсий бизнесини йўлга қўйганди.

«Мен кун бўйи тиним билмай ишлардим. «Идиш-товоқларни ювиш, мижозларга хизмат кўрсатиш, барменлик - ҳаммаси менинг зиммамда эди. Лекин ҳеч қачон пицца пиширган эмасман».

Минонинг италияликларга хос хислатлари оилага меҳрибон бўлишини таъминлаган. Forbes журнали томонидан дунёнинг энг нуфузли агентлари қаторида эътироф этилган Райола чиндан ҳам кўпроқ ўз оиласи даврасида бўлишга интилади, мижозлардан хабар олиб туради. Бугун ҳам ўз ўғли - Марио билан бирга.

«Фарзандим ёнида бўлиш ёқимли. Болалик пайти Марио Златанга қандайдир ҳайрат, қўрқув билан боқарди. Бир пайтлари Ибра уни «Феррари»да сайр қилдирарди. Ҳозир Марио билан аввалгидан кўра кўпроқ кўришиб турамиз. Илгари сафарлар туфайли ёнида бўлолмаганман».

*** «Ҳаёт шунақа, ундан ортда қолмаслик учун тинмай олдинга интилишга тўғри келади. Клублар билан музокара олиб бориш, барча керакли кишилар билан учрашиш учун парвоз қилиш менга жуда ёқади».

*** «Погба ҳозирча бор маҳоратини кўрсата олмаяпти. Янги муҳитга мослашиш учун вақт керак. Мухлислар умумий манзарани тасаввур қилолмайдилар. Кейинги 10 йил ичида Поль «МЮ» етакчиси сифатида тўп суради».

*** «Охирги икки мавсум Мхитарян Германиянинг кучли футболчиси бўлди. Яхши спорт формасига эришгач, «МЮ»нинг муҳим ўйинчисига айланади».

Поль Погба хусусида Алекс Фергюсон ва Мино Райола ўртасида айрим зиддиятлар бўлганлиги рост. Уларнинг иккови ҳам футболчининг «МЮ»га қайтишига қаршилик қилишмаган.

«Ўзаро муносабатларимиз Полнинг қайтишига монеълик қилган эмас. 2012 йилда ўз маҳоратини ошириш учун жамоани тарк этганди. Фао­лиятим давомида Фергюсон билан икки бор учрашганман. Илк суҳбатимиз ёқимли таассурот қолдирган. Иккинчиси эса... Эҳ, ҳаётимда ҳали бунчалик хурсандчилик бўлмаганди! Мистер Фергюсоннинг нуқтаи назари меникига зид бўлсада, уни жуда ҳурмат қиламан. Сэр Алекс - буюк мураббий! Бироқ Полнинг бугунги баҳоси ўша пайтда тўғри йўл тутганлигимни исботлайди, деб ҳисоблайман».

*** «Аслида, Погбани «Ювентус»­га ўтиш нотўғри йўл эканлигига ишонтиришга урингандим. Буни кўпчилик билмайди. Чунки Италия клублари сўнгги пайтларда ёш иқтидорларни тарбиялаш борасида мақтана олишмайди. Ижобий мисол сифатида фақат Паоло Мальдинини кўрсатиш мумкин. Шу боис, «Ювентус»га ўтишни тўғри қарор, деб ҳисобламаганман».

*** «Поль барибир, Туринга йўл олди. Кейинчалик муносабатларимизга совуқчилик тушди. Ахир менинг маслаҳатимга қулоқ солмаганди. Аммо ўз қарорини шундай изоҳлади: «Бу - сенинг нуқтаи назарингни писанд қилмаганимдан эмас, Мино - шунчаки, енгил йўлни танладим. Жиддий синовларда тобланмоқчиман. Унинг «МЮ»га қайтишига ҳам шу сабаб бўлди. ЕЧЛдан четда қолиши Полга аввалдан маълум эди. Бироқ у мураккаб вазиятда ўзини кўрсатиш имкониятига эга эди. Фергюсон «сэр» унвонига лойиқ кўрилган. Балки мени ҳам Погбани «МЮ»га қайтарганим учун шундай унвон билан сийлашар!?»

Марио Балотеллига «Ман Сити»ни тарк этишга изн берганини Райола ўта жиддий хато, деб баҳолайди.

«Унинг «Сити»дан кетишига йўл қўймаслигим керак эди. Марио бахтсизлигидан нолиган пайт унга далда беришим, «Ҳовлиқма, ўзингни қўлга ол» дейишим лозим эди. Қаттиққўллик талаб этилган ҳолда меҳрибонлик кўрсатдим. Тўғри, Марио меҳрга муҳтож бўлган. Аммо футболчи ҳар қандай вазиятда фақат футбол ҳақида ўйлаши керак. Бошқа ҳеч нарсани эмас. Топ даражада ўйнаш учун бутун куч-эътиборни футболга сарфлаши лозим. 10-12 йил ўзини аямай тўп сурганидан сўнг қандай истаса шундай яшайверади».

*** «Илк мижозларимдан бири Павел Недвед бутун эътиборини футболдаги муваффақиятга қаратди. Шу билан бирга ўз оиласига ҳам садоқатли эди. Балотелли эса тўғри йўлни танлай олмади, обрў-эътиборидан жудо бўлди».

Ливерпулдаги ачинарли фаолиятдан сўнг «Ницца»дан қўним топган италиялик ҳужумчи бой берилган нуфузни қайта тиклаш йўлида астойдил бел боғлаган кўринади. Ҳар ҳолда, Марио янги жамоада ўз ўрнини топа олди ва тўпурарга айланди. Жамоа эса турнир жадвалини бош­қариб бормоқда.

«Мухлисларнинг салбий муносабати туфайли Марио Италия клубларида эркин ҳаракатлана олмади. «Ницца»да ўзини кўрсатса, инглиз жамоалари учун «мазали пирог»га айланиши аниқ. Ёзда Марио эркин агент мақомида бўлади. Францияга эса Балотелли кабилар жуда керак. Тез орада барибир, у АПЛга қайтади».

*** «Ромелу Лукаку борасида музокаралар олиб борилмоқда. Унинг «Эвертон»да ушланиб қолиш эҳтимоли кўпроқ. Футболчи бу жамоадаги мавқеидан мамнун. «Сандерленд» билан бўлган ўйинда «хет-трик»ка эришгач, телефон орқали боғландим ва... ёмон ўйнаганини, 3та эмас, 6та гол уриши кераклигини таъкидладим. «Ювентус» хусусида гап бўлганди, лекин ҳозир Италиянинг ҳеч бир клуби Лукакуни харид қилишга қодир эмас. Англия ташқарисида «ПСЖ», «Бавария», «Барселона» ва «Реал»гина бу ишни уддалашлари мумкин.

Мино Райола шунингдек, ҳозирча кўпчиликка таниш бўлмаган, лекин яқин йиллар ичида барчани лол қолдириши кутилаётган иқтидорли «полапонлар» ҳақида ҳам маълумот берди.