Сульшер: "Мен тантанавор равишда бу ерни тарк этяпман, чунки клуб учун боримни берганимни ҳамма билади деб ўйлайман"

- Бу клуб мен учун нимани англатишини ва бу ерда нимага эришмоқчи бўлганимни биласиз. Буларнинг барчаси клуб, мухлислар, футболчилар, ходимлар учун. Кейинги қадамни чемпионлик учун курашиш, совринлар ютиш учун ташлашни истардим.

Мен барчаси учун жавоб беришни хоҳламайман... Журналистлар мендан интервью олишни сўрашмоқда, йўқ, мен ҳеч қандай интервью бермайман.

Мен тантанавор равишда бу ерни тарк этяпман, чунки клуб учун боримни берганимни ҳамма билади деб ўйлайман. Бу клуб борлиғимни англатади. Афсуски, керакли натижаларга эриша олмадим, энди четга чиқиш вақти келди.

- Қарийб уч йилдан бери жамоага мураббийлик қиляпсиз. Ортда қолган натижалардан фахрланасизми?

- Жудаям фахрланаман. Бу ҳаётимдаги орзулардан биридир.

Аввал футболчи, кейин ўринбосарлар жамоаси мураббийи, кейин навбатдаги иш, яъни ягона орзу бу асосий жамоани бошқариш эди. Мен буни бошдан кечирдим.

Биринчи дақиқадан сўнгги дақиқагача ўтган ҳар бир лаҳза жуда катта завқ берарди, шу боис барча футболчиларга раҳмат айтишим керак, чунки жамоани қабул қилганимдан бери улар доимо ўзларининг энг яхши ўйинларини намойиш этишди. Кимдир келди, кимдир кетди, лекин барча футболчилар билан ишлаш ўзгача мароқ эди.

Клуб эгаларига менга имконият бергани учун раҳмат айтмоқчиман, чунки ҳамма ҳам бундай имкониятга бўлавермайди, лекин менга бу лавозим ишониб топширилди.

Мен учун бу шараф, жамоани дастлаб ташриф буюрганимдан ҳам яхшироқ ҳолатда қолдиришга умид қиламан.

Бу ерда яхши дўстлар орттирдим, бир қанча беназир дўстлар билан муносабатларни тикладим. Янги ходимлар келди, дарҳақиқат, улар билан ҳам иноқ бўлиб қолдим, - деди Сульшер.