"Стадионларга қайтамиз"

"Стадионларга қайтамиз" – "La Gazzetta dello Sport"нинг охирги сони муқовасида шундай сарлавҳа акс этган. Шунингдек, биринчи саҳифада — умидвор нигоҳли болакай.

Италия ҳукумати Европа чемпионати учрашувларини стадионларда томошабинлар билан ўтказишга рухсат берди. Режага кўра, Римда 4та ўйин бўлиб ўтиши лозим:

Италия – Туркия, 11 июнь
Италия – Швейцария, 16 июнь
Италия – Уэльс, 20 июнь
Чорак финал, 3 июль

"Олимпико" стадионидаги ўйинни трибуналардан 15,5 минг мухлис томоша қилиши мумкин — стадион умумий сиғимининг 25%. 

Энди Лига президенти Паоло Дель Пино чемпионат учрашувларига тифозини ҳам киритишга рухсат беришларини истамоқда.

"Биз яқин орада стадионларга ҳеч бўлмаса минг нафар мухлисни қайтаришимизга рухсат беришларига умид қиламиз, — дейди Даль Пино. — Стадионларнинг очилиши бўйича қайдномалар бир йилдан буён муҳокамада. Чемпионатнинг охирги учрашувларида, "Евро"даги каби трибуналарда 25% томошабин бўлишини истардик. Бу йирик мусобақа олдидан ўзига хос тест ҳам бўларди".

Албатта, бу нормал ҳаёт тарзига қайтиш учун катта қадам. Томошабинлар учун ҳам ажойиб янгилик бўларди. Аммо бунда клубларга ёрдам ҳам бор. Бўш трибуналарда ўтган учрашувлар — молиявий жиҳатдан улкан йўқотишларни англатади. Мавсум сўнгида эса катта, муҳим учрашувлар айниқса кўп бўлади. Улар орқали клублар кўп бўлмаса-да фойда кўришлари мумкин эди. А Сериянинг 37-турида "Ювентус" уйда "Интер"ни қабул қилади, "Рома" эса дербида "Лацио" билан тўқнаш келади, 38-турда – "Аталанта" "Милан"га қарши майдонга тушади.

Нозима Зарипова таржимаси