“Спорт ТВ”да “Евротайм” ғойиб бўлди

Англия, Испания, Италия ва Германия миллий чемпионати ўйинлари натижалари ва урилган голлар намойиш этиб бориладиган дастур 8 декабрь куни эфирга чиқиши керак эди. Аммо номаълум сабабларга кўра “Евротайм” намойиш этилгани йўқ.

СПОРТ телеканали юқоридаги чемпионатларни кўрсатиш ҳуқуқини сотиб олгани йўқ. Шу боис ҳам мухлислар айнан шу дастур орқали ўйиндаги голларни томоша қилиб боришаётганди. Бироқ энди катта эҳтимол билан бу ҳам томошабинлар учун армонга айланади шекилли.

Телеканал раҳбарияти Европа чемпионлар лигаси ва Англия премьер-лигасининг баъзи ўйинларини кўрсатиш ҳуқуқини сотиб олишни режалаштирганди. Бироқ Uzreport Tv иккала мусобақани трансляциясини харид қилди. Бундан ташқари Uzreport TV ЕВРО-2016 финал босқич ўйинларини намойиш этиш ҳуқуқини ҳам сотиб олди.

Бироқ Uzreport TV айни пайтда фақат Тошкент шаҳридагина эфирга узатилмоқда. СПОРТ телеканали эса бутун республикада намойиш этилади. Шу боис кўплаб футбол мухлислари айнан СПОРТ ТВ йирик мусобақаларнинг трансляциясини сотиб олишини истамоқда.