"Шўртан" билан хайрлашадиган сони ортиб бормоқда

Дарҳақиқат, жамоани тарк этиши мумкин бўлганлар кундан кунга кўпайиб бормоқда. Бундан бир неча кун олдин жамоа расмий сайтида клубни тарк этадиган футболчилар номи қисман келтириб ўтилганди. Жумладан литвалик псобон Павел Леусга мураббийлар штаби жавоб бериб юборишган. Шунингдек Шавкат Раимқулов, Шукур Жумабоев, Азиз Мансуров каби ўйинчилар ҳам иккинчи даврани бошқа жамоада ўтказиши тўғрисида айтиб ўтилган. Олинган сўнгги маълумотларга кўра, юқоридаги футболчилардан ташқари жамоа таркибини бошқа асосий фигуралар ҳам тарк этишни ўйлаб туришибди.

Ғузорликлар сафида бир неча йиллардан буён тўп суриб келаётган Обид Жўрабоевга Нефтчидан таклиф тушган. Марказий ярим ҳимоячи Дилявер Абибуллаевга ҳам олий лиганинг икки вакилидан таклиф бўлган. Яъни "Олмалиқ" ва "Динамо" Абибуллаевни ўз сафида кўришни истамоқда. Футболчи яқин кунларда қарорини эълон қилса ажаб эмас. Шунингдек тасдиқланмаган хабарларга қараганда, Шўртаннинг яна бошқа бир футболчиси Иброҳим Отахонов ҳам катта эхтимол билан иккинчи даврани "Динамо"да ўтказиши мумкин. Ҳужумчи Александр Востриков ҳам жамоани тарк этиши хусусида маълумотлар бор.

Шундай экан "Шўртан" асосий таркиб футболчиларидан айрилиб қолиши кутилмоқда. Эътиборлиси ҳануз жамоа таркибига бирорта ҳам янги футболчи қўшилиши тўғрисида янгилик йўқ. Воқеалар ривожини кузатамиз.

Исломбек Рустамбеков.