Игорь Сергеев: "Кейинги ўйин борлиги сабаб ҳисобдаги фарқни оширмоқчи эдик"

— Ўйиндан таассуротлар қандай?

— Тарихда биринчи марта ғалаба қозондик, албатта қувончли. Ҳаво совуқ эди, минус ҳарорат, аммо йигитлар ҳаракат қилишди. Мураббийнинг кўрсатмасини бажаришга ҳаракат қилдик, қаердадир уддаладик, қаердадир йўқ. Кейинги ўйин борлиги сабаб ҳисобдаги фарқни каттароқ қилмоқчи эдик, аммо мураббийлар, йигитлар, ҳамма бу ҳали бошланиши эканини, жавоб ўйини борлигини билади ва у ерда бир неча баробар оғирроқ бўлади. Сабаби улар уйда ўйнашади, таркиблари тўлиқ бўлади. Бугун асосий таркибда ўйнамаган бўлсам ҳам мамнунман.

— Жароҳатдан тикланганингиздан сўнг ўзингизни қандай ҳис қиляпсиз?

— Иккита расмий ўйинда ҳаракат қилдим, бунга қадар йиғинда эса 5-6та ўйин ўтказдим ва жароҳат безовта қилмаяпти. Ҳозирда жароҳат ҳақида ўйламасликка ҳаракат қиляпман ва бу такрорланмаслиги учун машқлар қиляпман.

— Бунга қадар ҳам "Ал Ҳилол"га қарши ўйнагансиз ва гол ҳам ургансиз. Ўша "Ал Ҳилол" билан бугунгисининг фарқи қандай?

— Фарқ яққол кўриниб турибди. Олдин ҳам яхши ўйинчилар бўлган, аммо жаҳон даражасида эмас, Осиё даражасида. Ҳозирги номларни бутун дунё билади. Умуман олганда, нафақат "Ал Ҳилол", балки бутун Саудия Арабистони умуман ўзгарганиб кетган.