Саудия Арабистони мураббийининг кайфияти чоғ

Ушбу ғалабадан сўнг гуруҳдаги асосий рақибимиз Саудия Арабистони 11 очко билан биринчи ўринга кўтарилиб олди. Жамоа бош мураббийи Эрве Ренар ОФК сайтига берган интервьюсида ғалабадан ва жамоаси кўрсатган ўйиндан мамнун эканлигини айтиб ўтди. 

- "Муҳим ғалабани қўлга киритдик, бунинг учун федерация, футболчилар ва мураббийлар штабимиз билан фахрланаман. Лекин мақсадимизга эришиш учун ҳали ишлашда давом этамиз. Ҳозирча эса ҳаммани муҳим ғалаба билан табриклайман". 

- "Ўйинга келадиган бўлсак, токи биринчи голни уриб олгунча қийин бўлди. Аммо саросимага тушмадик, чунки ғалабага бўлган ишонч юқори эди. Ўз навбатида Қувайтга қарши ўртоқлик учрашуви ўтказиб олганимиз ҳам катта ёрдам берди. Бир қатор ёшларни бу ўйинда синаб кўрдик. Фаластин бизга қарши узун тўп оширишлар билан ўйнашни маъқул кўрди, лекин биз бунга ҳам тайёр эдик", - дейди 52 ёшли франциялик мураббий.

Эслатиб ўтамиз, Саудия Арабистони - Ўзбекистон учрашуви 15 июнь куни бўлиб ўтади.