Санжар Шоаҳмедов: “Гуруҳдан чиқса бўлади”

Жорий мавсум олий лигамизда 2-ўринни эгаллаган Тошкентнинг “Локомотив” клуби келаси йил ҳам ушбу нуфузи юқори бўлган мусобақада иштирок этади. Қуръага кўра “Темирйўлчилар” “А” гуруҳидан жой эгаллади. Хўш, “Локомотив” учун қуръа қандай келди? Бу ҳақда жамоа етакчиларидан бири Санжар Шоаҳмедовнинг фикрлари билан қизиқдик.

- Кўпчилик қатори мен ҳам Куала-Лумпур шаҳрида ўтказилган қуръа ташлаш маросимини катта қизиқиш билан кузатиб бордим. Менимча жамоамиз ўрин олган “А” гуруҳи у қадар кучсиз ёки кучли дея олмайман. Ҳамма жамоа билан бемалол ўйнаса бўлади. Эроннинг “Сепахон” клуби мамлакат чемпиони ҳисобланади. БААнинг “Ал Наср” жамоаси ҳақида илиқ фикрларни билдириш мумкин. Хуллас нуфузи жиҳатдан Осиёда энг юқори бўлган ушбу мусобақада кучсиз жамоанинг ўзи йўқ. Шундай экан ҳар бир рақибга хурмат билан қараб, жиддий тайёрланмоқ лозим.

- “Локомотив”даги келажагим борасида ҳозир сизга аниқ бир нима дея олмайман. Хориж жамоаларидан таклифлар бўлаётганини яшириб ўтирмоқчи эмасман. Лекин бир тўхтамга келганимиз йўқ. Балки келаси йил ҳам “Локомотив”да ўйнарман. Менимча бу масала янги йилга қадар аниқ бўлади – дейди Санжар Шоаҳмедов.

Исломбек Рустамбеков суҳбатлашди.