Санжар Қувватов: "Иккала жамоа ҳам ғалабага ҳақли эди"

Учрашувдан сўнг "шерлар" дарвозабони Санжар Қувватовнинг фикрлари билан қизиқдик.

"Насаф"нинг ўйинларини кўриб чиқдик. Жамоа жуда ҳам яхши шаклланганига гувоҳ бўлдик. Шу боис бизда ҳеч қандай бўшашиш бўлгани йўқ. Тўла тўкис тайёргарлик кўрдик", - дея ўйин ҳақида қисқача фикрини билдирди Қувватов.

ФОТО  "Пахтакор" ва "Насаф" иштирокидаги супер ўйиндан ФОТОМАҚОЛА

- Ҳумоюн Муртазоев билан бирга-бир вазиятдаги сейвингиз туфайли "Пахтакор" бугун очко йўқотмади десак бўлади. Ўша вазиятни ёдга олсангиз...

- Албатта жамоамга фойдам текканидан хурсандман. Тўпни қайтариш учун бор кучим билан ўйнадим. Ўша вазиятда гол ўтказиб юбормаслик шарт эди, акс ҳолда... Ўйинни охиригача чидаб беришгани учун жамоадошларимга раҳмат айтаман.

- Ўйин жиҳатдан олиб қараганда қандай натижа адолатли бўларди? 

- Менимча биз кўпроқ ҳужум қилдик. Лекин, иккала жамоа ҳам ғалабага ҳақли эди. Омад деган нарса ҳам бор. Охиригача ҳаракат қилганимиз учун ҳам омад бизга кулиб боқди деб ўйлайман. 

- Учрашувдан кейин "Насаф" кийим алмаштириш хонасига кириб чиқдингиз...

- Собиқ жамоадошларимга яхши ўйин учун раҳмат айтиб чиқдим. Йигитлар билан кўришмаганимга анча бўлганди. Шу баҳонада кўриб чиқдим. 

- Ҳумоюн Муртазоевга ҳеч нима демадингизми? 

- Йўқ-йўқ. Ҳумоюн билан битта туманда яшаймиз. Ўйин пайтида озгина қизишиб кетди, бу оддий ҳол.

Толибжон Қосимов суҳбатлашди