Рустам Мирсодиқов: "Ҳисоб бундан-да йирикроқ кўринишда ҳам бўлиши мумкин эди..."

Рустам Мирсодиқов, “Металлург” ФК бош мураббийи: - “Пахтакор” бизнинг энг ноқулай рақибимиз. Бу жамоага қарши футболчиларни ҳар сафар ҳам руҳан, ҳам жисмонан тайёрлаймиз. Машғулотларда йигитлар барчасини бекаму кўст адо этишади, бироқ ўйинда майдонга чиқишганида камчиликлар, нуқсонлар кўпайиб кетади. Биринчи даврада – Тошкентда ўтказилган ўйинни ёдга олинг. Камида дурангга эришишимиз керак бўлган ўйинда мағлубиятга учраганмиз. Бу сафар йигитларга катта раҳмат. Ўзларини йўқотиб қўйишмади.

Бор куч ва маҳоратларини ишга солиб, тўқсон дақиқа давомида ташаббусни рақибга бермасликка ҳаракат қилишди. Масъулиятни ҳамма бирдек ҳис этди, шу боисдан ҳам керакли натижани қўлга киритдик. Ҳисоб бундан-да йирикроқ кўринишда ҳам бўлиши мумкин эди, агар ўйинчиларимиз барча имкониятлардан унумли фойдаланишганида. Асосийси ғалаба қозондик ва таъқибчиларимиздан бироз узоқлашиб олишга эришдик. Шу куни стадионда бизни қўллаб-қувватлаб турган мухлисларимизга ҳам миннатдорчилик билдираман, барча футбол ишқибозларини эса яқинлашиб келаётган Қурбон ҳайити байрами билан табриклайман, дейди Рустам Тўхтамуродович.

"Металлург" матбуот хизмати