Рустам Дўрмонов: "Ҳакамлар ҳақидаги гаплар бўлган ва бўлаверади"

- Очиғи, "Ёзёвон-Лочинлари"га қарши ўйин "оғир" ўтди. Бунга бир қатор сабаблар бор. Хусусан, биз ўтган турда "Цементчи" билан бўлган беллашувда катта куч йўқотгандик. Футболчилар бу ўйиндан кейин ўзларини тиклаб олишга улгуришмади. Натижада "Ёзёвон-Лочинлари"га қарши баҳсда ўзимиз хоҳлаган ўйинни намойиш қила олмадик. Бош мураббий сифатида жамоамнинг ўйини менга манзур бўлгани йўқ. Аммо айтишим керак, рақиб менда илиқ таассурот қолдирди. Рости, меҳмонлардан бундай ўйин кутмагандим. Ажойиб жамоа шаклланибди.

Ҳакам ҳақидаги гаплар доим бўлган ва бўлаверади. Мен ҳакамларнинг ишига аралашмайман. "Ғиждувон" билан бўлган ўйинимиздан кейин ҳам каминадан ҳакамлар ҳақида сўрашган эди. Ўшанда ҳам гапирмаслигимни айтгандим. Бугун ҳам шу фикримда қоламан. Ҳакамларнинг ишини муҳокама қилиш бизнинг иш эмас. Агар шундай қилсак, нима қиламиз футболда ишлаб?! "Ёзёвон-Лочинлари" аъзоларига ҳакамларнинг қарорлари ёқмаган бўлиши мумкин. Бу табиий ҳол. Бироқ голларимиз "тоза" киритилди. Балки уларга қоида бузилишлардаги қарорлар ёқмагандир? Яна қайтараман, мен жамоамнинг ўйинидан қониқмадим. Тўғриси, шу куни бизга кўпроқ омад кулиб боқди. Аммо биринчи ғалаба қўлга киритилганидан хурсандман, - дейди Дўрмонов.

Фурқатбек Нишонов