Руфат Акрамхўжаев: “Зомин” билан ўйинда омад биздан юз ўгирди”

Ўз майдонида осонликча таслим бўлмайдиган “банкирлар”нинг ушбу муваффақиятсиз ўйинидан сўнг жамоа бош мураббийи Руфат Акрамхўжаев қуйидагиларни таъкидлади.

- Учрашув жангавор ва кескин курашлар остида ўтди. Бунгача ҳар икки жамоа ҳам турнир жадвалида ёнма-ён ўрин эгаллаб турганди. Приципиал рақибимиз бўлмиш “Зомин”ни ҳар қандай вазиятда ҳам ютишимиз зарур эди. Шу боис ўйинга пухта тайёргарлик кўриб, жиддий қарагандик. Аммо бизнинг кунимиз эмас экан, якунда омад юз ўгирди.

- Гол уриш учун бир қанча вазиятларни юзага келтирган бўлсакда, уларни муваффақиятли якунлай олмадик. Бунга меҳмонларнинг посбони йўл қўймади деган фикрдан йироқман. Шунчаки биз ўзимиз аниқ харакат қилмадик. Омад келмаса бариси бекор деб бежизга айтишмас экан.

- Ўйин жуда муросасиз руҳда ва кескин тўқнашувларга бой тарзда кечди. Зоминлик футболчилар ҳаддан зиёд қўпол ўйин кўрсатишди. Баҳс поёнига етиб бораётганида етакчи ўйинчимиз Леонид Кошелевга нисбатан рақиб футболчиси ҳаводаги тўп учун курашда, жиддий жарохат етказди. Қолаверса ўша футболчининг ўзи ҳам жабр чекди. Бу каби очиқдан-очиқ қўполлик ишлатадиган футболчиларни керак бўлса, умрбод футболдан дисквалификация қилиш жоиз деб ўйлайман.

- Бу –футбол. Энди кейинги ўйинга эътибор қаратган холда, хатолар устида ишлаймиз ва қимматли очколарни қайтариш учун бор кучни берамиз –дейди Руфат Акрамхўжаев.

Исломбек Рустамбеков.