Рўзиқул Бердиев: "Биз кучли гуруҳдан жой олганмиз"

Рўзиқул Саъдуллаевич интервью давомида ОЧЛ ўйинига тайёргарлик қандай бўлгани, рақиблар ҳамда имкониятлар борасида тўхталиб ўтди.

- "Насаф" ОЧЛ 1-тур баҳсини сафарда "Персеполис"га қарши ўтказади. Бу ўйинга тайёргарлик қандай бўлди?
- 30 январь куни “Ал Файсали”ни мағлуб этганимиздан сўнг футболчиларга бироз дам бергандик. 3 февралдан ўз қароргоҳимизда йиғилиб машғулотларни бошладик. 5 февралдан легионерлар, шунингдек U-23 Осиё чемпионатида қатнашган ёшларимиз таркибга қўшилишди. “Персеполис” билан ўйингача "Шўртан" ва "Динамо" билан назорат баҳси ўтказдик.

- “Персеполис”га қарши кечадиган баҳс сиз учун қанчалик муҳим?
- Биз биринчи мақсадни уддаладик, яъни гуруҳ босқичига йўл олдик. Эндиги вазифа гуруҳ ўйинларида яхши қатнашиш. Ўйлайманки, биз кучли гуруҳдан жой олганмиз. “Персеполис” Эрон чемпионатида бекорга биринчи ўринни эгаллаб тургани йўқ. Бу жамоа тартибли футбол намойиш этади. Таркибида Эрон терма жамоасига номзод футболчилар бор. Албатта, биз ҳам иштирокни ижобий бошлашни хоҳлаймиз. Бунинг учун бор куч билан ўйнаймиз.

- “Насаф” жой олган гуруҳда шунингдек, “Ал Васл” билан “Ал Садд” ҳам бор.
- “Ал Садд” ҳақида кўп эшитганмиз. Уларнинг асосий устун жиҳати бутун жамоа бўлиб тўпни назорат қилишда. “Ал Садд” тўп билан ўйнашда кучли. Қолаверса, таркибида машҳур Хави ўйнаётганини унутмаслик керак. Бу жамоа ҳозир ўз чемпионатида иккинчи ўринда боряпти. “Ал Васл” ҳам БАА чемпионатида иккинчи ўринни эгаллаб турибди. Жамоа таркибида юқори савияли легионерлар бор дея оламан. Кўриб турганингиздек, рақиблар жиддий, шунга қарамай, биз ҳам улар учун бошоғриқ бўла оламиз. Бемалол айтишим мумкин, “Насаф” ҳеч бир жамоага осонликча таслим бўлмайди.

- Сизнингча, “Насаф” таркибида кимлар ўзини кўрсатиши мумкин?
- Жамоамиз сафи асосан ёшлардан иборат ва бу улар учун яхшигина мактаб бўлади. Таркибда янада кучли футболчилар бўлишини хоҳлардим, лекин баъзи ўйинчиларга таклиф билан чиққанимизда индашмади. Биз эътиборни жамоавий ўйинга қаратамиз. Лекин катта ўйинларда ғалаба қозониш учун маҳоратли футболчилар ҳам бўлиши керак. Чунки замонавий футболда барибир номлар кўп нарсани ҳал қиляпти. Умид қиламанки, бу йилги чемпионлар лигасида Драган Черан, Жасур Ҳасанов, Ислом Кенжабоев, Бобир Абдухолиқов, Азиз Ғаниев каби футболчилар ўзларини кўрсата олишади.