Рўзиқул Бердиев: "Рақиб ҳимоясининг бўшлигини билардик"

"Бугинги ғалаба билан мухлисларни табриклайман. "Ал Аҳли"ни ўрганганларимиз иш берди. Айниқса ҳисоб қисқарганидан кейинги вазиятлар ҳақида ҳам алоҳида гапириб ўтиш мумкин", - дейди Рўзиқул Бердиев.

- Балки, биз ҳам айёрликларни ўрганармиз, ҳадеб арабларни ўйинини томоша қилмасдан?

- Атайин ўргатмаймиз. Лекин айрим футболчилар шундай вазиятларда қандай йўл тутишни биладилар.

- Бойдуллаевнинг қизил карточкасига берилган апелациянинг жавоби қандай бўлди?

- Буни ОФК бир ой давомида кўриб чиқар экан. Шунинг учун бугунги вазиятда унинг хизматидан фойдалана олмадик.

- Кўриндики, рақиб ҳимоясида муаммолар етарлича бўлди. Нима учундир, биринчи бўлимда ярим ҳимоячилар жуда ҳам яхши вазиятда турган ҳужумчиларга тўғри пас бера олмадилар...

- "Ал Аҳли"нинг ҳимоясининг бўшлигини биз ҳам билардик. Менимча кучли ҳаяжон ва босим туфайли ҳужум ҳамда ярим ҳимоя ўртасида боғлиқлик бўлмади деб ўйлайман. Иккинчи бўлимда эса бу муаммони ечгандек бўлдик.

- Раҳматуллаевда сариқ карточка бўлишига қарамай, иккинчи бўлим ўрталарида рақиб футболчиси билан айтишди, ҳакамнинг оғзаки огоҳлантиришига қарамай тинчишни истамади. Бу жамоага қимматга тушиши мумкин эди?

- Тўппа - тўғри. Айнан шу вазият бошланганида Артурни чақириб Дилшодни ховуридан тушириши лозимлигини айтмоқчи бўлган эдим, аммо мухлисларга тўла стадионда буни уддасидан чиқа олмадик. У билан бу вазият ҳақида гаплашамиз. Сабаби кейинги ўйинларда бундай муаммолар бўлиши керак эмас.

Матбуот анжуманига Рўзиқул Бердиев билан учрашувнинг энг яхши футболчиси Бобур Абдухолиқов ҳам иштирок этди:

- Мухлисларимизни қувонтирганимиздан хурсандмиз. Бугун яхши ўйин бўлди ва биз ғалаба қозондик. Биринчи бўлимдаги вазиятлардан фойдалана олмадик, иккинчисида эса мураббийимиз берган кўрсатмаларни тўлиқ бажара олдик деб ўйлайман.

Нодирхўжа Юлдашев.