Рўзиқул Бердиев: "Қандай логотип билан ўйнашнинг аҳамияти йўқ"

Ўйин ҳақида

- Осон ўйин бўлмади. Кўраяпсизлар, Суперлигада осон ўйиннинг ўзи қолгани йўқ. Биз "Бухоро" жамоасини темпни тушириб ўйнашини билардик. Шу боисдан ҳам шунга мос ҳаракат қилдик. Тезроқ рақиб дарвозасига гол киритишимиз зарур эди, бу иккинчи бўлим охирига келиб амалга ошди. Мухлисларимиз бугун бизни жуда яхши қўллаб-қувватлашди. Барчани ғалаба билан табриклайман.

- Ўтган ўйиндаги муваффақиятсизликдан сўнг жамоада руҳий муаммо бордек кўринди...

- Ҳа, бундай холат ҳар бир жамоада учраб туради. Ўйлайман-ки, бугунги ўйин мана шу босимдан чиқиб кетишимизга ёрдам беради.

- Жамбули Жигаури ўртоқлик ўйинларида ўзини яхши кўрсатаётганди. Бироқ, Суперлига доирасидаги ўйинларда сермаҳсуллик намойиш этмаяпти...

- Жигаури янги футболчи. У ҳали бизнинг чемпионат ҳақида тўлиқ тасаввурга эга эмас. Суперлигамиз даражаси юқори. Жигаури учун озроқ вақт керак.

- "Насаф" аутсайдерларга қарши ўйинларда қийналаяпти. Бунинг сабабини қандай изохлайсиз?

- Бунақа натижалар аввал ҳам бўлган. Футболда кутилмаган ҳисоблар учраб туради. Рақиблар бизга ҳимоявий ўйин таклиф этишаяпти, бўш худудлар кам ва қийналаяпмиз. "Турон" билан ўйинда биринчи бўлимнинг бошидаги вазиятларимиздан фойдаланганимизда ҳисоб бошқача бўлиши мумкин эди.

- "Насаф" ҳимояда қийналса, кейинги ўйинда "Пахтакор" ҳам шундай услубдан фойдаланмайдими?

- "Пахтакор" ҳужумкор жамоа. Бу клуб сафида тажрибали номлар бор. Биз улар иштирокидаги ўйинларни кўриб чиқамиз ва шунга мос услубни танлаймиз.

- "Насаф" учун қайси логотип остида ўйнаш маъқулроқ?

- Биз "аждар" бўлиб қоламиз. Ҳар икки логотип остида ўйнашнинг фарқи йўқ. Аввал ҳам хумо қуши логотипида ўйнаганмиз, аждар тасвирида ҳам. Муҳими, "Насаф" ҳар ўйинда ғалаба учун майдонга чиқади.